«Energııa únemdeý - 2020» baǵdarlamasy aıasynda birqatar baǵyttar boıynsha jańa qadamdar eskerilgen
ASTANA 27 tamyz. QazAqparat - Búgin Úkimet otyrysynda «Energııa únemdeý - 2020» baǵdarlamasy aıasyndaǵy máseleler talqylandy.
Aıta keteıik, bıylǵy qańtarda Úkimettiń keńeıtilgen otyrysynda Elbasy Nursultan Nazarbaev atalǵan arnaıy baǵdarlamany ázirleýdi tapsyrǵan bolatyn.
Qujat boıynsha búgin Indýstrııa jáne jańa tehnologııalar vıtse-mınıstri Nurlan Saýranbaev baıandama jasady. Onyń aıtýynsha, talqylaýlar barysynda jergilikti atqarý organdarynyń ónerkásiptik jáne turǵyn úı kommýnaldyq kásiporyndarynyń, qoǵamdyq uıymdardyń, sondaı-aq tıisti memlekettik organdardyń usynystaryn eskere otyryp, baǵdarlamaǵa jańa energııa tutyný júıesin qurý boıynsha jumystardyń negizgi baǵyttary engizildi.
«Energııa únemdeý - 2020» birneshe baǵyt boıynsha jańa qadamdardy qarastyrady. Onyń ishinde energııa tıimdi kásiporyn baǵytynda ónerkásiptik kásiporyndardyń energııa tıimdiligin mindetti túrde 30 paıyzǵa arttyrý sharalaryn iske asyrý, energııa tıimdi qurylys baǵytynda 2015 jyldan bastap barlyq qurylystyq normalardy, erejelerdi qatańdatyp, energııa tıimdi qurylysty qamtamasyz etý, energııa tıimdi kólik baǵyty boıynsha temirjol lokomotıvteri men áýe kemelerin jańartyp, otyndy paıdalaný kólemin 30 paıyzǵa deıin tómendetý turǵysynda únemdi kólikterdi satyp alýǵa halyqty yntalandyrý sharalary eskerilgen.
Sonymen qatar osynyń aıasynda 2020 jylǵa deıin bıýdjettik sektorda energııa resýrstardy tutynýdy 25 paıyzǵa deıin tómendetý arqyly atalǵan mekemelerdiń energııa tıimdiligin arttyrýdyń keshendi baǵdarlamasyn júzege asyrý eskerilgen.
