Energııa tapshylyǵy: Atyraýda qosalqy stantsııa qashan paıdalanýǵa beriledi

ASTANA. KAZINFORM — Atyraýda «Samal» qosalqy stantsııasy qarasha aıynda qosylady, dep habarlaıdy oblys ákimdiginiń baspasóz qyzmeti.

Vedomstvo atap ótkendeı, Atyraý qalasyndaǵy «Samal» jáne «Saryózek» yqshamaýdandaryn turaqty energııamen qamtamasyz etýge arnalǵan jańa qosalqy nysannyń qurylysy aıaqtalýǵa jaqyn. 

— Búginde jumys kóleminiń 90 paıyzy oryndaldy. Joba aıasynda qýattylyǵy 16 MVt bolatyn eki transformator ornatylǵan. Stantsııa qarasha aıynda iske qosylady. Osy baǵdarlama sheńberinde «Nursaıa» qosalqy stantsııasynan «Samal» qosalqy stantsııasyna deıingi uzyndyǵy 2 shaqyrym bolatyn 110 kVt joǵary kerneýli elektr jelisi jerasty kabeldik jelige aýystyrylyp jatyr, — delingen ákimdik taratqan aqparatta.

Osyǵan deıin atyraýlyq kásipker qurylys materıalyna suranys artqanda elektr togy óship, shyǵynǵa batyp jatqanyn aıtqan edi. Tok 2-4 saǵat sónse, apparat qosýǵa taǵy sonsha saǵat jumsaıdy. Kazinform tilshisi Energetıka mınıstrligi men Atyraý oblysy ákimdiginen sebebin surap bildi.