Energııa resýrstaryn tutyný qurylymynda kómirdiń ornyn tabıǵı gaz basady - «Ulttyq energetıkalyq baıandama»
ASTANA. QazAqparat - KAZENERGY qaýymdastyǵy búgin «Ulttyq energetıkalyq baıandamanyń» 2-shi shyǵarylymyna arnalǵan baspasóz máslıhatyn ótkizdi.
«Ulttyq energetıkalyq baıandamanyń» ekinshi shyǵarylymynda dúnıejúzilik ekonomıkanyń negizgi úrdisteriniń qazaqstandyq segmenttegi jaǵdaıǵa áseri, Qazaqstan munaıynyń aýqymyn saqtap qalý jáne arttyrý múmkindikteri jan-jaqty taldanǵan. Baıandama avtorlary kómir óndirisiniń bolashaǵyna, qazirgi jaǵdaıǵa jáne Qazaqstan ýranyna suranys perspektıvasyna, elektr energııasy óndirisin ulǵaıtýdyń tıimdiligine jáne basqa da salalarǵa zertteý júrgizgen.
Qazirgi kezeń tek energetıkalyq sala úshin ǵana emes, jalpy Qazaqstan ekonomıkasy úshin de qıyn-qystaý kezeń. Qazirde respýblıkanyń munaı-gaz salasyn dúnıejúzilik syn-qaterlerge birtin-birtin beıimdeý, Qazaqstan munaıyn ótkizetin naryqty saqtap qalýǵa múmkindik beretin saraptalǵan, tujyrymdalǵan ýaqtyly sheshim qabyldaý qajettigi jáne elimizdiń tutynýshylary úshin munaı ónimderi baǵasynyń qoljetimdi bolýy eń ótkir másele bolyp tur», - delingen baıandamada.
UEB avtorlary elektr energııasyn tutynýshylar sanynyń ósý keleshegi týraly aıta kelip, energııa tutynýshylardyń sany buryn boljamdanǵan mólsherden az bolatynyn atap kórsetken. Boljam boıynsha elektr energııasyn qorytyndy tutyný mólsheriniń ortasha jyldyq qarqyny 2015-2040 jyldar aralyǵynda 1-1,2 paıyz deńgeıde bolady jáne de elektr energııasy óndirisiniń aýqymy 2030 jyly 111 mlrd. kVt*saǵ. dep baǵalanyp otyr. Munyń ózi kem degende 34 mlrd. kVt*saǵ., ıaǵnı Qazaqstan boıynsha bazalyq boljamnan az.
Baıandamada 2015 jyly Qazaqstannyń mańyzdy seriktesi ári energııa resýrstarynyń iri tutynýshysy Qytaıdyń energetıkalyq sektorynyń damýyna zertteý júrgizilgen. Qytaı energııa resýrsyn ótkizetin iri naryq bolyp qala beredi dep kútilýde. Dese de Qazaqstannyń Qytaıǵa kómir jáne elektr energııasyn eksporttaý boıynsha múmkindikteri shekteýli. Qytaıǵa ýran eksporty ondaǵy ýran qorynyń jınaqtalý qarqynyna baılanysty bolashaqta 56 paıyz úlespen azaıtylýy múmkin.
Munaı ónimderin tutyný bóliginde Qazaqstanda ony tutyný mólsheri birshama ósedi jáne MÓZ jańartylýyna qaraı óndiris jáne tutyný balansyna qol jetkiziledi dep kútilýde.
Baıandama avtorlary munaıǵa degen dúnıejúzilik suranystyń azaıýyna qaraı gaz óndirý jáne tutyný mólsheriniń artatynyn boljamdap otyr. Іshki naryqqa tabıǵı gaz jetkiziliminiń artýy birte-birte energııa resýrstaryn tutyný qurylymynda kómirdiń ornyn basady dep kútilýde.
Qazaqstanda energııa resýrstaryn tutyný balansynda kómirdi paıdalaný úlesi shamamen 66 paıyzdy quraıdy. Biraq, respýblıkadaǵy gaz óndirisiniń, atom energetıkasy jáne jańaratyn energııa kózderiniń damyp kele jatqanyn eskersek, kómir úlesi 2040 jylǵa qaraı 40 paıyzǵa deıin tómendeıdi dep boljanǵan.
