Energııa óndirýshi uıymdardyń otyn úshin bereshegi qansha
ASTANA. KAZINFORM – 2024 jyly elimizde 10 energoblokty, 55 qazandyqty jáne 45 týrbınany kúrdeli jóndeý josparlanǵan. Bul týraly Úkimet otyrysynda Energetıka mınıstri Almasadam Sátqalıev aıtty.
«Ótken eki aıda mınıstrlik óńirlerdiń ákimdikterimen birlesip problemalyq máseleler boıynsha mynadaı tıisti sharalar qabyldady. «Tarazenergotsentr» aktsıonerlik qoǵamynyń tórtinshi jylý elektr ortalyǵynda № 1 týrbınany, «Pavlodarenergo» aktsıonerlik qoǵamynyń ekinshi jylý elektr ortalyǵynda № 2 qazandyqty, «GRES Topar» jaýapkershiligi shekteýli seriktestiginiń № 12 (qazandyǵyn jáne «EEK» aktsıonerlik qoǵamynda elektr stantsııasyndaǵy № 3 energoblokty jóndeý bastaldy. Elektr stantsııalarynyń gaz úshin bereshegi 25-ten 18-ge deıin, al kómir úshin 6-dan 3,4 mlrd teńgege deıin qysqardy», - dedi A. Sátqalıev.
Onyń aıtýynsha, energııa kózderiniń otyn qoımalarynda 3,7 mln tonna kómir jáne 90 myń tonna mazýt jınaqtalǵan.
«Júıelik operator bekitken elektr stantsııalarynda jóndeý kestesine sáıkes 2024 jyly 10 energoblokty, 55 qazandyqty jáne 45 týrbınany kúrdeli jóndeý josparlanǵan. Ártúrli kezeńde 1 energoblokty, 28 qazandyqta jáne 22 týrbınada jóndeý jumystary atqarylyp jatyr. Atap aıtqanda, 4 energoblokta, 21 qazandyqta jáne 17 týrbınada jóndeý jumystary aıaqtaldy», - dedi mınıstar.
Onyń sózine qaraǵanda, 15 tamyzdan bastap kúzgi-qysqy kezeńde jumysqa daıyndyq pasportyn alýǵa qujattardy qabyldaý bastaldy. Mınıstrlik qyrkúıek aıynan bastap 256 myń tonna kóleminde «áleýmettik» mazýtty jetkizýge qatysty tıisti kesteni bekitti.
«Energııa óndirýshi uıymdardyń otyn úshin kredıtorlyq beresheginiń edáýir kólemi mańyzdy problema sanalady. Energııa óndirýshi uıymdardyń «QazaqGaz - Aimaq» aktsıonerlik qoǵamy aldyndaǵy bereshegi 18 mlrd 307 mln teńgeni qurady. Sondaı-aq «Bogatyr-Kómir» jaýapkershiligi shekteýli seriktestigi aldynda 3 mlrd 462 teńge somasynda bereshek bar. Energetıkalyq kásiporyndar bereshekti óteýdi jedeldetýi tıis», - dedi vedomstvo basshysy.
