Energııa óndirýshi uıymdardyń otyn úshin aıtarlyqtaı kredıtorlyq bereshegi saqtalyp otyr
ASTANA. KAZINFORM – Eldiń energetıkalyq ınfraqurylymyn jylytý maýsymyna daıyndaý maqsatynda Úkimet rezervinen 27,9 mlrd teńge bólindi. Bul týraly búgin Úkimet otyrysynda Energetıka mınıstri Erlan Aqkenjenov aıtty.
- Energııa kózderiniń otyn qoımalarynda 4,2 mln tonna kómir jınaqtaldy, sondaı-aq 137 myń tonna mazýt qory qalyptastyryldy. Bul kórsetkishter ótken jylmen salystyrǵanda 2 paıyz joǵary. Mınıstrlik qyrkúıek aıynan bastap kólemi 255 myń tonna «áleýmettik» mazýt jetkizý kestesin bekitti. Osyǵan baılanysty sharttardy jasasý jáne qajetti otyn qoryn qamtamasyz etý jumystaryn jedeldetý qajet. Búgingi kúni energııa óndirýshi uıymdardyń otyn úshin aıtarlyqtaı kredıtorlyq bereshegi saqtalyp otyr. Atap aıtqanda, elektr stantsııalarynyń «QazaqGaz Aimaq» kompanııasynyń aldyndaǵy bereshegi 71,9 mlrd teńge, - dedi mınıstr.
Erlan Aqkenjenovtiń málimetinshe, eldiń energetıkalyq ınfraqurylymyn jylytý maýsymyna daıyndaý boıynsha shuǵyl sharalardy qabyldaý maqsatynda Úkimet rezervinen 27,9 mlrd teńge, onyń ishinde:
- jylý kózderin jóndeýge jáne salýǵa 12,7 mlrd teńge;
- jylý jelilerin salýǵa jáne rekonstrýktsııalaýǵa 8,4 mlrd teńge;
- elektr jelilerin rekonstrýktsııalaýǵa 6,8 mlrd teńge bólindi.
- Bıyl 377 shaqyrym jylý jelisin jóndeý jáne rekonstrýktsııalaý úshin 196,8 mlrd teńge qarastyrylǵan. Onyń ishinde: 82,5 mlrd. teńge bıýdjet qarajaty, 98,1 mlrd teńge «Energetıkalyq jáne kommýnaldyq sektorlardy jańǵyrtý» ulttyq jobasy aıasynda, sondaı-aq 16,2 mlrd. teńge kásiporyndardyń tarıftik smetalary esebinen. Atap ótsek, bıyl jylý jelilerin qarjylandyrý 34 paıyzǵa, jumys kólemi 14 paıyzǵa artty. Búgingi tańda oryndalý deńgeıi 65 paıyz quraıdy. Osyǵan baılanysty ákimdikter jylytý maýsymy bastalǵanǵa deıin jóndeý jumystarynyń kólemderin qysqartpaı, tolyq oryndaýy qajet, - dedi ol.
Aıta keteıik, otyrysta Úkimet basshysy Oljas Bektenov ońtústik óńirlerdiń elektr energııasy senimdiligin kúsheıtýdi tapsyrdy.
