Energııa óndirýshi uıymdardyń qaryzy tarıfterge áser ete me
ASTANA. KAZINFORM — Energııa óndirýshi kompanııalardyń negizgi bereshegi gaz stantsııalaryna qatysty. Bul týraly Energetıka vıtse-mınıstri Suńǵat Esimhanov aıtty.
Búgin Úkimet otyrysynan keıingi baspasóz máslıhatynda energııa óndirýshi uıymdardyń qomaqty qaryzy aldaǵy ýaqytta tarıfterdiń ósýine qanshalyqty áser etetini suraldy.
- Rasynda, osyndaı bereshek bar. Olar negizinen gaz stantsııalaryna tıesili. Byltyr ekinshi jartyjyldyqta gaz baǵasynyń kóterilýine baılanysty bul bereshek paıda boldy, ıaǵnı bolashaqta tarıfter esebinen jabylýy múmkin. Degenmen, otyn shyǵyndarynyń negizgi bóligi retinde sanalmaıdy, bul negizinen jóndeý jáne eńbekaqyǵa qatysty. Qazir ótinimderdi qarap jatyrmyz jáne ol ósim aıtarlyqtaı áser etpeıdi dep oılaımyn. Atap aıtqanda, sońǵy tarıfke ortasha eseppen 4-5% paıyz deńgeıinde áser etýi yqtımal, - S. Esimhanov.
Onyń aıtýynsha, tarıfter birden óspeıdi. Bul rette ótinimder berilgennen keıin, qoǵamdyq tyńdaýlar ótýi tıis. Sondyqtan osy protseske birneshe aı ýaqyt kerek.
Buǵan deıin habarlanǵandaı, energııa óndirýshi uıymdar QAZAQGAZ AIMAQ-qa 37,7 mlrd teńge qaryz.
