Energııa óndirýshi uıymdar QAZAQGAZ AIMAQ-qa 37,7 mlrd teńge qaryz — Energetıka mınıstrligi
ASTANA. KAZINFORM — Energııa óndirýshi uıymdar QAZAQGAZ AIMAQ-qa 37,7 mlrd teńge qaryz. Bul týraly Úkimet otyrysynda Energetıka vıtse-mınıstri Suńǵat Esimhanov aıtty.
— Ótken kúzgi-qysqy kezeńde energııa kózderiniń otyn qoımalarynda 5,6 mln tonnaǵa deıin kómir jáne 152 myń tonna mazýt jınaqtaldy. Ýákiletti memlekettik organdarmen, «Qazaqstan temir joly» ulttyq kompanııasy» aktsıonerlik qoǵamymen jáne kómir óndirýshi kásiporyndarmen úılestirilgen jumystyń arqasynda barlyq energııa kózderindegi otyn qory normatıvke sáıkes keldi, — dedi ol.
Vıtse-mınıstr dereginshe, kommýnaldyq-turmystyq sektor, áleýmettik obektiler jáne halyq úshin kómir daıyndaý jospary 7,46 mln tonna kómir deńgeıinde aıqyndalǵan. Onyń ishinde kommýnaldyq-turmystyq sektor úshin — 1,6 mln tonna, halyq úshin — 5,8 mln tonna. Ótken jylytý kezeńinde 8,15 mln tonna kómir nemese kezeń josparynan 109,8 paıyz daıyndaldy.
— Energııa óndirýshi uıymdardyń otyn úshin kredıtorlyq beresheginiń edáýir kólemi mańyzdy problemalyq másele sanalady. Energııa óndirýshi uıymdardyń QAZAQGAZ AIMAQ aktsıonerlik qoǵamy aldyndaǵy bereshegi 37,7 mlrd teńgeni quraıdy, — dedi Suńǵat Esimhanov.
Aıta keteıik, otyrysta ótken jylytý maýsymy qorytyndylanyp, aldaǵy maýsymǵa daıyndyq barysy pysyqtalyp jatyr.
