Energııa óndirýshi uıymdar QazTransGaz-Aımaqqa 17 mlrd teńge qaryz - mınıstr

ASTANA. KAZINFORM — Energııa óndirýshi uıymdardyń otyn úshin kredıtorlyq beresheginiń edáýir somasy qalyptasty. Bul týraly QR Energetıka mınıstri Erlan Aqkenjenov málim etti.

- Energııa kózderiniń otyn qoımalarynda 4,4 mln tonna kómir bar, bul byltyrǵy deńgeıinen 9%-ǵa artyq. 131,9 myń tonna mazýt jınaqtalǵan, osy kórsetkish ótken jyldyń deńgeıinen 32 paıyzǵa joǵary. Sonymen qatar «Sevkazenergo» AQ JEO-2-de kómir qory normatıvtik deńgeıinen tómen. Mınıstrlik qyrkúıek aıynan bastap 257 myń tonna kóleminde «áleýmettik» mazýtty jetkizý kestesin bekitti. Sharttar jasasýdy jáne otynnyń tıisti qoryn qamtamasyz etýdi jedeldetý qajet, - dedi E. Aqkenjenov Úkimet otyrysynda.

Onyń aıtýynsha, energııa óndirýshi uıymdardyń otyn úshin kredıtorlyq beresheginiń edáýir kólemi mańyzdy problema sanalady. Energııa óndirýshi uıymdardyń «QazTransGaz-Aımaq» AQ aldyndaǵy bereshegi 17 mlrd teńgege jýyq.

- Sondaı-aq energııa óndirýshi uıymdardyń «Bogatyr-Kómir» JShS aldynda 94 mln teńge somasynda bereshegi bar, - dedi mınıstr.

Budan buryn habarlanǵandaı, Úkimette jylý berý maýsymyna daıyndyǵy tómen óńirler ataldy.