Energııa óndirýshi uıymdardyń otyn úshin qomaqty qaryzy bar - mınıstrlik

ASTANA. QazAqparat – Energııa beretin nysyndardyń otyn qoımalarynda 4 mln tonna kómir jáne 85 myń tonna mazýt bar. Bul týraly Energetıka vıtse-mınıstri Jandos Nurmaǵanbetov aıtty, dep habarlaıdy QazAqparat tilshisi.

«Energııa beretin nysyndardyń otyn qoımalarynda 4 mln tonna kómir jáne 85 myń tonna mazýt jınaqtalǵan. Sonymen qatar normadan tómen otyn qory 5 stantsııada baıqaldy», - dedi Jandos Nurmaǵanbetov Úkimet otyrysynda.

Onyń aıtýynsha, energııa óndirýshi uıymdardyń otyn úshin kredıtorlyq beresheginiń qomaqty somasy jınaqtalǵan.

«Energııa óndirýshi uıymdardyń «QazTransGaz-Aımaq» aktsıonerlik qoǵamy aldyndaǵy bereshegi 12 mlrd 972 mln teńgeni qurady. Sondaı-aq energııa óndirýshi uıymdardyń «Bogatyr-Kómir» JShS aldynda 6 mlrd 923 mln teńge somasynda bereshegi bar. Energetıkalyq kásiporyndar bereshekti óteýdi jedeldetýi kerek», - dedi vıtse-mınıstr.