Energııa óndirýshi uıymdardyń ınvestıtsııalyq qyzmetiniń ashyqtyǵy qamtylady - Parlament
ASTANA. 14 maýsym. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine elektr energetıkasy, tabıǵı monopolııalar men retteletin naryq sýbektileriniń ınvestıtsııalyq qyzmeti máseleleri boıynsha tolyqtyrýlar men ózgerister engizý týraly» zańdy qabyldady.
Atalǵan zań energııa óndirýshi uıymdardyń, tabıǵı monopolııalar jáne retteletin naryq sýbektileriniń ınvestıtsııalyq mindettemelerin oryndaý úshin jaýapkershilikti kúsheıtýge baǵyttalady. Sonymen qosa, osy baǵyttaǵy kórsetiletin qyzmetter sapasyn, energııa óndirýshi uıymdardyń ınvestıtsııalyq qyzmetiniń ashyqtyǵyn arttyrý qarastyrylady. Investıtsııalyq baǵdarlamalardy bekitý reglamenttelip, ınvestıtsııalyq baǵdarlamalardy oryndamaǵan jaǵdaıda olardyń ıgerilmegen qarajattary tutynýshylarǵa qaıtarylatyn bolady. Budan bólek, elektr stansylarynyń ınvestıtsııalyq qyzmetiniń ashyqtyǵy qamtamasyz etiledi. Onyń ishinde, osy baǵdarlamaǵa qatysty mindettemelerdiń barlyǵy BAQ-ta jarııalanyp turatyn bolady. Sonymen qatar, ınvestıtsııalyq mindettemelerdiń oryndalýyna baqylaý tetigi kúsheıtiledi. Olardyń ınvestıtsııalyq mindettemeleriniń tarıftik tabys deńgeıine sáıkestigi qadaǵalanady.
Jalpy zań jobasynyń negizgi maqsaty - Qazaqstan ekonomıkasynyń elektr qýatyna qajettiligin qamtamasyz etý bolyp tabylady. Sondaı-aq, qujat elimizdegi elektr stansylarynyń ınvestıtsııalyq qyzmetteriniń ashyqtyǵyn qamtýdy kózdeıdi. Jańa elektr qýattaryn iske qosýǵa jáne elimizdegi ındýstrııalyq-ınnovatsııalyq damý baǵdarlamasyn iske asyrýǵa múmkindik beredi.
