Energııa nysandaryn josparly jáne ýaqtyly iske qosý kerek — Oljas Bektenov

— Memleket basshysy Ulttyq quryltaıda kómir energetıkasyn damytýdyń mańyzdylyǵyna toqtalyp, kómirmen qýat óndirý isi boıynsha Ulttyq joba qabyldaýdy tapsyrdy. Joba aıasynda 5 jyl ishinde jańa 8 stantsııa salý jáne qoldanystaǵy 11 stantsııany jańǵyrtý esebinen 8 GVt qosymsha energııa qýatyn alý kózdelip otyr. Kómir ónerkásibi jáne kómir stantsııalarynda elektr energııasyn óndirý otandyq otyn-energetıkalyq keshenniń negizgi salalary sanalady. Olar elimizdiń energetıkalyq qaýipsizdigin qamtamasyz etedi, — dedi ol.

Oljas Bektenov Memleket basshysy el ekonomıkasynda kómirmen qýat óndirý isiniń mańyzyn árdaıym atap ótip, salany odan ári damytý úshin birqatar baǵyttardy aıqyndap bergenine nazar aýdartty.

— Kómir qory boıynsha biz álemdegi jetekshi 10 eldiń qataryna kiremiz. Bul — bizdiń eleýli básekelik artyqshylyǵymyz, ony tıimdi paıdalanýǵa tıispiz. Kómir álem elderinde, sonyń ishinde eń kóp energııa paıdalanatyn óndiristermen qatar, tsıfrlyq platformalar úshin de mańyzdy qýat kózderiniń biri bolyp qala beredi. Sonymen qatar keıingi ýaqytta qorshaǵan ortaǵa áseri barynsha az «Taza kómir» tehnologııalary belsendi damyp keledi. Bul baǵytta Qytaı, AQSh, Úndistan, Ońtústik Koreıa jáne basqa elderdiń qalyptasqan tájirıbeleri bar. Atap aıtqanda, keıingi jyldary kómirqyshqyl gazy men qospalardy 90 paıyzǵa deıin ustap qalyp, zııandy qaldyqtardy qaýipsiz saqtaýǵa múmkindik beretin jańa tehnologııalar qarqyndy damýda. Osy baǵytta jumysty jalǵastyrý kerek, — dedi Úkimet basshysy.

Premer-mınıstr «Taza» tehnologııalardy qoldanystaǵy kómir stantsııalaryn jańǵyrtý maqsatynda, atap aıtqanda, aýaǵa taraıtyn zııandy qaldyqtardy azaıtyp, tıimdiligin arttyrý úshin de qoldanǵan jón ekenin aıtty.

— Biz qatań ekologııalyq standarttardy saqtaýǵa umtylyp, kómirdi belsendi paıdalanýdy josparlap otyrmyz. Bul óte mańyzdy, óıtkeni biz kómir stantsııalaryn áli de uzaq ýaqyt boıy paıdalanýdy josparlap otyrmyz. Memleket basshysy jańa Jylý stantsııalarynyń qurylysyn jedeldetý qajettigin atap ótti. Qazaqstanda tutyný kóleminiń ósýi men tsıfrlyq aktıvterdiń qarqyndy damýyn eskere otyryp, energııa nysandaryn josparly jáne ýaqtyly iske qosý kerek. Osy maqsatta naýryz aıynda kómir generatsııasy boıynsha Ulttyq joba qabyldandy. Energetıka mınıstrligi «Samuryq-Energo» kompanııasymen jáne óńir ákimdikterimen birlesip, Ulttyq jobanyń oryndalýyn erekshe baqylaýǵa alsyn. Árbir jańa stantsııanyń irgetasyn qalaýdan bastap iske qosýǵa deıingi barlyq jumystardyń naqty jospary bolýǵa tıis, — dedi Oljas Bektenov.

Aıta ketelik Pavlodar men Qaraǵandyda kómirden dızel óndiretin jobalar iske asyrylady.