Energııa nysandaryn jóndeýge bólingen qarajattyń ıgerilmeýine jol berýge bolmaıdy – Bektenov
ASTANA. KAZINFORM – Energetıka nysandaryn jóndeý naýqanyn ýaqtyly aıaqtaý úshin jumys qarqynyn arttyrý qajet. Bul týraly búgin Úkimet otyrysynda Premer-mınıstr Oljas Bektenov aıtty.
- Memleket basshysy ınjenerlik jáne kommýnaldyq ınfraqurylymnyń strategııalyq mańyzyn, sondaı-aq elimizdiń energetıkalyq jáne ınfraqurylymdyq negizin nyǵaıtý qajettigin árdaıym atap ótedi. Atalǵan maqsattarǵa jyl saıyn aýqymdy qarajat bólinedi. Bıyldyń ózinde energııa nysandaryn jóndeýge jáne jańǵyrtýǵa 851 mıllıard teńge kózdelgen. Bul ótken jylmen salystyrǵanda 60 paıyzǵa artyq. Onyń ishinde «Tarıfti ınvestıtsııaǵa aıyrbastaý» baǵdarlamasy aıasynda bıyl shamamen 384 mıllıard teńge bólindi. Bul 2025 jylǵy jóndeý naýqany aıasynda bólingen qarajattan 15 paıyzǵa kóp. Osyndaı kólemdegi qarjylandyrý jaǵdaıynda jóndeý merzimderin aýystyrýǵa, jumys qarqynyn báseńdetýge jáne bólingen qarajattyń ıgerilmeýine jol berýge bolmaıdy, - dedi Úkimet basshysy.
Premer-mınıstr jylytý maýsymynyń bastalýyna shamamen bir aı ýaqyt qalǵanyn, soltústik óńirlerde daıyndyq jumystaryn aıaqtaý merzimi budan da shekteýli ekenin eskertti.
- Sondyqtan jóndeý naýqanyn ýaqtyly aıaqtaý úshin jumys qarqynyn arttyrý qajet. Mendegi aqparat boıynsha birqatar óńirde jóndeý merzimderiniń keshigý qaýpi bar. Máselen, osyndaı táýekelder Kókshetaý, Temirtaý, Jezqazǵan qalalarynda oryn alyp otyr. Sondaı-aq Almaty jáne Soltústik Qazaqstan oblystarynda da jylý jelilerin jóndeý jumystary baıaý júrip jatyr. Energetıka nysandaryn qysqy kezeńge daıyndaýǵa jaýapty óńirlik shtabtardyń jumysyna nazar aýdaramyn. Birqatar óńirde olar eseptik kórsetkishterdi tyńdaýmen ǵana shektelip otyr. Jylytý maýsymyna daıyndyq barysyna bylaısha salǵyrt qaraýǵa bolmaıdy. Atqarylyp jatqan jumystardy turaqty baqylaýda ustap, naqty sheshimder qabyldaý qajet, - dedi Oljas Bektenov.
Aıta keteıik, otyrysta Úkimet basshysy Oljas Bektenov ońtústik óńirlerdiń elektr energııasy senimdiligin kúsheıtýdi tapsyrdy.
