Energııa nysandary pasporttarynyń daıyndyǵyna óńir ákimderi tikeleı jaýap beredi - Úkimet
ASTANA. KAZINFORM – Jylýmen qamtamasyz etý nysandaryn jóndeý jumystaryn tamyz aıynyń sońynan keshiktirmeı aıaqtaý qajet. Bul týraly Úkimet otyrysynda Premer-mınıstri Oljas Bektenov málim etti.
- Qazirdiń ózinde keıbir óńirlerde jumystardyń sozylyp ketý qaýpi týyndap otyr. Eger kúzde óńirlerde energııa nysandarynyń daıyndyq pasporttaryn almaıtyn jaǵdaılar tirkeletin bolsa, onda óńir ákimderi tikeleı jaýap beredi. Osyǵan baılanysty mynadaı tapsyrmalar beremin. Birinshiden, óńir ákimdikteri eki apta merzimde barlyq konkýrstyq rásimderdi ótkizip, jóndeý jumystaryna naqty kirisýi qajet. Eshqandaı basy artyq bıýrokratııa bolmaýy kerek. Jylýmen qamtamasyz etý nysandaryn jóndeý jumystaryn tamyz aıynyń sońynan keshiktirmeı aıaqtaý qajet. Ónerkásip jáne qurylys mınıstrligi, óńir ákimdikteri 1-shi qyrkúıekke deıin bilim berý jáne densaýlyq saqtaý nysandarynyń tolyǵymen daıyn bolýyn qamtamasyz etsin, - dedi O.Bektenov.
Onyń aıtýynsha, soltústik, ortalyq jáne shyǵys óńirlerde barlyq ınjenerlik ınfraqurylym men turǵyn úı-kommýnaldyq sharýashylyq nysandary 15-shi qyrkúıekke deıin, al qalǵan óńirlerde – 15-shi qazanǵa deıin tolyq ázir bolýy tıis.
- Ákimderge jylý nysandaryna turaqty negizde baryp, jaǵdaıdy jeke baqylaýǵa alýdy tapsyramyn. Ekinshiden, KEGOC kompanııasy Energetıka mınıstrligimen birlesip, 25-shi mamyrǵa deıin ulttyq mańyzy bar stantsııalarǵa arnalǵan jabdyqtardyń jumys rejımderin bekitýi kerek. Jumystardyń kólemi men olardy qarjylandyrýdy qysqartýǵa tyıym salamyn. Árbir fakt boıynsha menshik ıelerine, sol sııaqty basqarýshy kompanııalarǵa qatysty sharalar qabyldanatyn bolady, - dedi Úkimet basshysy.
Sonymen qatar Energetıka mınıstrligine Kólik mınıstrligimen jáne ákimdiktermen birlesip, 1-shi qyrkúıekke deıin jylý kózderi men temirjol tuıyqtarynda otyn qoryn aldyn ala jınaqtaýdy qamtamasyz etý júkteldi.
Budan buryn habarlanǵandaı, el aýmaǵynda 2025 jyly elektr energııasyn tutyný 2024 jylmen salystyrǵanda 4,6 mlrd kVt/saǵatqa nemese 3,8 paıyzǵa artyp, 124,6 mlrd kVt/saǵatty qurady.
