Energııa kózderiniń jetispeýi iri kásiporyndar úshin úlken problemaǵa aınalýy múmkin - Úkimet basshysy
ASTANA. KAZINFORM – Energııa kózderiniń jetispeýi aldaǵy ýaqytta iri kásiporyndar úshin úlken problemaǵa aınalýy múmkin. Bul týraly Úkimet otyrysynda Premer-Mınıstr Álıhan Smaıylov aıtty.
Elektr energetıkasy – el ekonomıkasynyń «tamyryna qan júgirtip», turaqty damýǵa negiz bolatyn biregeı sala. Memleket basshysy óz Joldaýynda keminde 14 GVt kóleminde qosymsha qýat kózderin iske qosýdy tapsyrdy. Jalpy ishki ónimdi 2 esege deıin ósirý úshin bizge osyndaı kólemde energııa qýaty qajet. Ol úshin energetıka salasy tez damýy tıis. Qazirdiń ózinde bizdiń elimizde elektr energııasynyń tapshylyǵy bar. Energııa kózderiniń jetispeýi aldaǵy ýaqytta iri kásiporyndar úshin úlken problemaǵa aınalýy múmkin. Óıtkeni, boljam boıynsha Qazaqstanda energııa tutyný kólemi turaqty óse beretin bolady», - dedi Úkimet basshysy.
Sondyqtan, onyń atap ótýinshe, elimizdegi energııa balansyn saqtaý úshin batys oblystardyń gaz qýattaryn tartý jumystary júrgizilýde. Soltústik jáne Ońtústik aımaqtarda generatsııalaý kólemin ulǵaıtýǵa basymdyq berildi.
«Atap aıtqanda, bıyl Ekibastuz GRES-1-de Birinshi energııa blogyn qalpyna keltirý jobasyn aıaqtaý josparlanyp otyr. Kókshetaý, Semeı jáne Óskemen qalalarynda jańadan Jylý elektr ortalyqtaryn salý máselesi pysyqtalýda. Ońtústik óńirlerde gaz generatsııalaý jobalary iske asyrylýda. Olar 2025-2026-shy jyldary aıaqtalady. 2030 jylǵa qaraı jańartylatyn energııa kózderiniń 15% úlesine qol jetkizý maqsatynda Total Energies, Acwa Power jáne Masdar sııaqty strategııalyq ınvestorlarmen iri jobalar iske asyrylatyn bolady. Jalpy, 2035 jylǵa deıin Qazaqstannyń biryńǵaı elektr energetıkalyq júıesine shamamen 26 GVt bazalyq jáne manevrlik generatsııany iske qosý josparlanyp otyr. Qabyldanyp jatqan sharalar elektr energııasynyń tapshylyǵyn joıýǵa jáne 2030-shy jylǵa qaraı onyń rezervin qamtamasyz etýge múmkindik beredi», - dedi Álıhan Smaıylov.
