Energetıkterdiń aılyǵy respýblıkalyq ortasha jalaqydan da tómen – kásipodaq ókili
NUR-SULTAN. QazAqparat – Elimizdegi bilikti energetıkter kórshi elderge ketip qalyp jatyr, dep habarlaıdy QazAqparat tilshisi.
Qazaqstandyq energetıkterdiń salalyq kásipodaǵynyń tóraǵasy Orazbek Bekbas energetıka salasyndaǵy jumysshy mamandardyń aılyǵy sońǵy 20 jyldan beri ózgermegenin aıtady.
«Búginde Qazaqstandaǵy jylý-elektr energııasyn óndiretin jáne taratatyn kásiporyndarda áleýmettik turaqtylyqqa qater tóndiretin ahýal qalyptasyp otyr. Buǵan keıingi 20 jyldan beri ózgermeı kele jatqan eńbekaqy deńgeıiniń tómendegi ákeldi. Ulttyq statıstıkanyń málimetteri boıynsha, 2020 jyldyń tórtinshi toqsanynda eldegi ortasha eńbekaqy kólemi 233 136 teńge bolǵanda energetıkaterdiń aılyǵy 6,86% tómen bolǵan» - deıdi kásipodaq tóraǵasy.
Ol, sondaı-aq, bulaı jalǵasa berse, bilikti mamandardyń bári kórshi elderge oıysyp ketýi múmkin degen qaýpin bildirdi.
«Mysaly «Atyraý-Jaryq» AQ-daǵy 1311 jumysshynyń 98-i jumystan óz erkimen ketken. Qostanaı jylý-energetıkalyq kompanııasyndaǵy 753 adamnyń 256-sy basqa jumysqa aýysqan. «SevKazEnergo» kásipornyndaǵy 1150 jumysshynyń 191- Reseıden nápaqa tabýǵa ketken», - dedi Orazbek Bekbas.
Kásipodaq tóraǵasy kórshi elderde energetıkterge degen kózqaras basqasha ekenin de aıtty.
«Eńbekaqynyń tómendigi kadrlardyń jalaqysy joǵary basqa salalarǵa, tipti kórshi memleketterge de ketýine alyp keledi. Mysal retinde, Reseıdegi energetıkterdiń jalaqysy jalpy eldegiden 21%-ǵa joǵary. Belarýs Respýblıkasynda bul kórsetkish 28%, al Qyrǵyz Respýblıkasynda 44%-ǵa joǵary», - dep túıindedi sózin Orazbek Bekbas.
