Energetıkter Qostanaı oblysyndaǵy qatty boran saldarynan kelgen zalaldy qalpyna keltirýde
NUR-SULTAN. QazAqparat - 7 sáýirindegi Qostanaı oblysynda qatty boran soǵyp, jeldiń ekpini 37 m/s-qa deıin jetken. Daýyl saldarynan elektr jelisi úzildi. Onyń ishinde «KEGOC» AQ-nyń elektr berý jelileri óshirildi, dep habarlaıdy QazAqparat tilshisi QR Energetıka mınıstrliginiń baspasóz qyzmetine silteme jasap.
Elektr berý jelileriniń zaqymdanýy saldarynan VL-500 kV «Qostanaı-Sokol», «Qostanaı – Chelıabınskaıa», «Jitiqara-Sokol», «Sokol – Esil», «Qostanaı – Kókshetaý», sondaı-aq VL-220 kV «Sokol-Zarechnaıa», «Sokol-Kachar», «Sokol-Lısakovskaıa» ajyratylǵan.
«Oblysta ajyratylǵan jeke jáne zańdy tulǵalardyń sany shamamen 40 myń abonentke jetti. Bastapqyda «KEGOC» AQ-nyń elektr jelilerinde buzýshylyq tirkeldi. Sonyń saldarynan «Mejregıonenergotranzıt» JShS, «EPK-forfait» JShS-nyń jelileri ajyratyldy. Joǵaryda atalǵan barlyq uıymdardyń bilikti qyzmetkerleri jelidegi avarııalyq jaǵdaıdy joıý boıynsha jumystardy únemi júrgizip otyrdy. 2020 jyldyń 7 sáýirinde saǵat 21.00-den 23.00-ge deıin tutynýshylar úshin shekteýlerdi ishinara alyp tastaý arqyly Qostanaı qalasyn elektrmen jabdyqtaýǵa jedel aýystyrý júrgizildi. Bul rette qaladaǵy tirshilikti qamtamasyz etetin barlyq obektilerge elektr qýaty berildi», - dep habarlaıdy mınıstrlikten.
Qarly boran saldary apattyq brıgadalardyń shyǵýyna qıyndyq týǵyzǵan. Artynsha Qostanaı oblysy TJD men ákimdiginiń avtotehnıkasy tartyldy. Jedel qyzmetter aýa raıynyń kúrdeli jaǵdaıyna qaramastan óńirdi elektrmen jabdyqtaýdy qalpyna keltirý boıynsha shuǵyl sharalar qabyldaǵan.
«Sondaı-aq «EPK-forfait» JShS qyzmetkerleri Qostanaı qalasy men aýdandar boıynsha kelip túsken barlyq ótinimderdi pysyqtady. Oblys energetıkteri táýlik boıy jumys istegenimen qalpyna keltirý jumystaryn júrgizý kezinde úlken qıyndyqtarǵa tap boldy. Qarly boran báseńdegennen keıin birinshi kezekte aýrýhanalar, sýmen jabdyqtaý, jylýmen jabdyqtaý sııaqty negizgi tirshilik etý nysandary elektrmen jabdyqtaýǵa qosyldy. Búgingi tańda sońǵy tutynýshyǵa deıin elektrmen qamtamasyz etý jumystary jalǵasýda. Elektr jelilerin qalpyna keltire otyryp, tutynýshylarǵa da jaryqty qosý jumystary júrgizilýde», - dep habarlaıdy mınıstrlikten.
Eske sala ketsek, soltústik óńirlerde úzilgen elektr jelilerin qalpyna keltirýge 17 brıgada jumyldyrylǵanyn habarlaǵanbyz. Daýyl kezinde Qostanaı oblysynyń júzdegen eldi mekeni elektr qýatynsyz qaldy. Al, Aqmola oblysynda 189 eldi mekendi elektrmen jabdyqtaý jelisine zaqym keldi.
