Energetıkalyq kompanııalar óndiristik qýatyn áli tolyq paıdalanyp otyrǵan joq
ALMATY. Shildeniń 8-i. QazAqparat /Erlik Erjanuly/ - Energııa óndiretin kásiporyndardy qaıta jańǵyrtý eń kókeıkesti máseleniń biri bolyp otyr. Ony AES Qazaqstan energııa óndirýshi kompanııalary prezıdenti Mamythan Salybekov QazAqparat tilshisine bergen suhbatynda aıtty.
«Elektr óndirýshi kásiporyndarda tarıf shekteýli bolǵandyqtan, uzaq ýaqyt boıy barlyq kiris shyǵyndy jabýǵa jumsalyp keldi. Sondyqtan da onda óndiristi jańartý kesheýildep baryp qolǵa alyndy. Sol sebepti elektr óndirýshi kompanııalardyń qýaty áli tolyq paıdalanylǵan joq. Keńes Odaǵy taraǵanannan keıin túrli saladaǵy árqıly óndiris oryndary jabylyp, jabylmaǵandary jartylaı ǵana jumys istegendikten elektr óndirýde biz 1991 jylǵy deńgeıge 2008 jyly ǵana jettik. Tek sodan keıin ǵana elektr óndirý salasynda qolaıdy ahýal qalyptasty. Alaıda elektr óndirýshi kásiporyndardyń qosymsha qýat óndirýine 2008 jyly bastalǵan álemdik qarjylyq-ekonomıkalyq daǵdarys aıtarlyqtaı óz áserin tıgizdi», deıdi AES Qazaqstan energııa óndirýshi kompanııalary prezıdenti Mamythan Salybekov. Onyń sózinen qaraǵanda, JEO jumysy aýa raıyna, al sý elektr stansylarynyń jumysy sý júıesine táýeldi. Jalpy AES Qazaqstan energııa óndirýshi kompanııalarynyń óndiristik qýaty: Óskemen GES-da 331 MVt, Shúlbi GES-da 702 MVt, Óskemen JEO-da elektr - 241,5MVt, jylý - 959 Gkal/saǵat, Sogra JEO-da elektr - 50 MVt, jylý - 216 Gkal/saǵat.
«Qazir óndiristik qýatty kóterýde Óskemen men Sogra JEO-da 2 jobamyz bar. Ol júzege asqan kezde Sogra JEO qýaty 25 Mvt-qa, Óskemen JEO-nyń qýaty 80 MVt-qa ulǵaıady. Joba boıynsha Sogra JEO-da 25 MVt-tyq bir týrbınany 50 Mvt-tyq týrbınaǵa aýystyrylady. Oǵan mamyr aıynda tender ótkizdik. Qazir 4 jetkizýshimen jumys jasap jatyrmyz. Tamyz aıyna deıin kelisimsharttar jasap, 2 jylda aýystyramyz. Al Óskemen JEO jobasynyń qujattary jasalýda. Ol 3 aıǵa sozylady», deıdi Mamythan Salybekov.
