Energetıkalyq sýsynnyń kesirinen kóz jumǵandar bar – dáriger

QYZYLORDA. KAZINFORM – Jarnamada energetıkalyq sýsyndardyń sharshaý, uıqysyzdyq, artyq júkteme kezinde sergektik syılaıtyny aıtylady. Biraq dárigerler ony jıi qoldaný júrekke qaýipti dep dabyl qaǵyp otyr. 

Qyzylorda oblystyq kópbeıindi aýrýhanasynyń kardıologııa-2 bólimshesi jáne sozylmaly júrek jetispeýshiligi kabınetiniń dárigeri Raýan Saılaýova energetıktiń kesirinen aýrýhanaǵa túsetinder baryn jetkizdi. 

– Bizdiń bólimshege 22, 32 jastaǵy jáne 33 jastaǵy eki – barlyǵy tórt naýqas tústi. Olar júrek syrqatyna, onyń ishinde sozylmaly júrek jetispeýshiligine shaldyqqan. Sonyń ekeýi ótken jyly, bireýi bıyl ómirden ótti. Bireýiniń júrek mıokardynyń jıyrylý qyzmeti tómendep, ómir súrý sapasy edáýir tómendegen. Naýqastardyń bári aýrýhanaǵa túskenge deıin keıingi bir jyl ishinde energetıkalyq sýsyndy turaqty paıdalanǵan. Dárigerler tıisti em-shara qabyldaǵanyna qaramastan ókinishke qaraı dertten aıyǵýy múmkin bolǵan joq, - dedi aýrýhana dárigeri. 

Energetıkalyq sýsyndy japonııalyq óndirýshiler jumysbasty qyzmetkerlerdiń belsendiligin arttyrý úshin oılap tapqan. Bertin kele qoldanys aıasy keńeıip, ony jas ta, jasamys ta tutynatyn boldy. 

– Bonn ýnıversıtetinde júrgizilgen zertteýge qatysýshylar energetıkalyq sýsyn ishkennen keıin 1 saǵat ishinde júrektiń soǵý jıiligi kúsheıgen. Al Amerıkanyń kardıologııa assotsıatsııasy zertteý júrgizgende 1 quty energetık ishken adamnyń 1,5 saǵatta qan qysymy aıtarlyqtaı joǵarylap, júrektiń elektrli belsendiligi (EKG-degi QT aralyǵynyń uzarýy) ózgeretini anyqtalǵan. Energetıkalyq sýsyndar júrek yrǵaǵynyń buzylýyna, tipti júrektiń toqtap qalýyna ákep soǵýy múmkin. Ásirese, bul júrek-qan tamyry aýrýy anyqtalmaǵan adamdar úshin qaýipti, - dedi Raýan Saılaýova. 

Dáriger gıpertonııa, arıtmııa, júrek ınfarktisin ótkergen, qant dıabeti bar adamdarǵa, jasóspirimder men balalarǵa, júkti jáne bala emizetin áıelderge sergitkish sýsynnan bas tartýǵa keńes beredi. 

Aıta keteıik, jyl basynda elimizde 21 jasqa tolmaǵan jasóspirimderge energetıkalyq sýsyn satýǵa tyıym salyndy.