Energetıkalyq sýsyndardy 21 jasqa deıingilerge satýǵa qatań tyıym salyndy - mınıstrlik

ASTANA. KAZINFORM – 2025 jyldyń qańtarynan bastap «Halyq densaýlyǵy jáne densaýlyq saqtaý júıesi týraly» Kodekske engizilgen túzetýler kúshine endi. Endi energetıkalyq sýsyndardy 21 jasqa tolmaǵan azamattarǵa satýǵa qatań tyıym salynady.

- Bul qadam ósip kele jatqan urpaqtyń densaýlyǵyn qorǵaý, semizdik pen juqpaly emes aýrýlardyń aldyn alý maqsatynda qolǵa alyndy, – delingen Oqý-aǵartý mınıstrliginiń úndeýinde.

Vedomstvoǵa qarasty Balalardyń quqyqtaryn qorǵaý komıtetiniń tóraıymy Nasymjan Ospanovanyń dereginshe, kún saıyn 14-16 jastaǵy jetkinshekter energetıkalyq sýsyndardy emin-erkin satyp alyp jatyr.

- Kóp jaǵdaıda satýshylardyń ózderi zań talaptaryn saqtamaıdy. Barlyq saýda núkteleriniń ıelerine zańdy qatań oryndaýǵa shaqyramyz: energetıkalyq sýsyndar dúkende de, avtomattarda da, ınternet arqyly da 21 jasqa deıingilerge satylmaýy tıis. Árbir saýda kezinde satyp alýshynyń jasyn rastaıtyn qujat tekserilýi kerek, – dedi ol.

Sondaı-aq saýda oryndarynda kelesi mazmundaǵy eskertý jazbasy kózge birden túsetin jerge qoıylýy tıis: «Energetıkalyq sýsyndardy jıyrma bir jasqa deıingi tulǵalarǵa satýǵa tyıym salynady».

Mınıstrlik ókilderi ata-analardy balalarymen ashyq sóılesýge, energetıkalyq sýsyndardyń zııany týraly túsindirýge jáne salaýatty ómir saltynyń jarqyn úlgisin kórsetýge shaqyrdy.

«Balalardyń ne satyp alyp júrgenine qyzyǵýshylyq tanytyp, olardyń densaýlyǵyna beıjaı qaramaý asa mańyzdy», – delingen úndeýde.

Aıta keteıik, buǵan deıin energetıkalyq sýsyndardy satýǵa lıtsenzııa berý kerek pe degen saýal talqyǵa túsken.