Energetıkalyq sektorda jańǵyrtýdyń ulttyq jobasyna qansha ınvestıtsııa kerek

ASTANA. KAZINFORM - Ulttyq jobany bes jáne odan da uzaq merzimde júzege asyrý úshin 13 trln teńge qajet. Bul týraly elordada «Energetıkalyq jáne kommýnaldyq sektorlardy jańǵyrtý» ulttyq jobasyn talqylaý kezinde Úkimet basshysynyń orynbasary Qanat Bozymbaev málim etti.

- Qazir energetıka jáne kommýnaldyq ınfraqurylym mıllıondaǵan adamdardyń ómirin qamtamasyz etetin ekonomıkanyń negizgi salalary ǵana emes, bul óńirlerdiń turaqty damýy, ekologııalyq qaýipsizdik, tehnologııalyq táýelsizdik jáne saıyp kelgende, elimizdiń árbir azamatynyń ómir súrý sapasy jaǵdaıy men tıimdiligine tikeleı baılanysty salalar. Energetıka jáne kommýnaldyq sektordy jańǵyrtý jónindegi ulttyq joba qordalanǵan ınfraqurylymdyq problemalardy sheshýge, sonymen qatar jańa tásilder, tehnologııalar men retteý úlgilerin engizýge baǵyttalǵan. Bul óz kezeginde óndiristik qýattardy, ınjenerlik jelilerdi, salalardy tsıfrlandyrýdy jáne qajet ınvestıtsııalardy tartýdy qamtıtyn aýqymdy transformatsııa, - dedi Q. Bozymbaev.

Aıta keteıik, atalǵan ulttyq jobany Úkimet byltyr jeltoqsanda bekitken bolatyn.

Onyń aıasynda energetıka, kommýnaldyq jáne generatsııalyq ınfraqurylymdy jańǵyrtý jáne salý, bıznes-protsesterdi tsıfrlandyrý eskerilgen.

- Aldyn ala esepteýler boıynsha Ulttyq jobany bes jáne odan da uzaq merzimde júzege asyrý úshin 13 trln teńge qajet. Bul qarajat 86 myń shaqyrym kommýnaldyq jelini jóndeýge ári jańadan qurylysty jalǵastyrýǵa, sondaı-aq jalpy qýaty 7,3 GVt qosymsha generatsııa kózderin engizýge kerek. Búginde qarjy ınstıtýttarynan uzaq merzimdi nesıeni tartý úshin tıisti normatıvtik-quqyqtyq baza quryldy. Qazir ulttyq jobany júzege asyrý kezeńine óttik. Bıyl pılottyq rejımde 48 tabıǵı monopolııa sýbektisi boıynsha shamamen 144 mıllıard teńge ınvestıtsııa tartylyp jatyr, - dedi Premer-mınıstrdiń orynbasary.