Energetıkalyq nysandardy túbegeıli jańǵyrtý iske asady — birlesken otyrys
ASTANA. KAZINFORM — Búgin Parlament palatalarynyń birlesken otyrysynda Memleket basshysy Qasym-Jomart Toqaev elimizdiń energetıkalyq jáne ınfraqurylymdyq negizin nyǵaıtýǵa qatysty pikir aıtty.
— Ekonomıkanyń jańa úlgisine kóshý úshin aldymen energetıkalyq, ınjenerlik jáne kólik-logıstıkalyq ınfraqurylymdy tolyqqandy damytý qajet. Bul mańyzdy úshtaǵan kez kelgen eldiń, sonyń ishinde Qazaqstannyń da negizgi tiregi sanalady. Sondyqtan biz energetıkalyq jáne kommýnaldyq salalardy jan-jaqty jańǵyrtý jumysyn qolǵa aldyq. Osy maqsatta buryn-sońdy bolmaǵan aýqymdaǵy Ulttyq jobany iske asyrý týraly sheshim qabyldandy, — dedi Qasym-Jomart Toqaev.
Prezıdenttiń aıtýynsha, ony júzege asyrý úshin tek bıyldyń ózinde 1 trıllıon teńgeden astam qarjy bólý josparlanyp otyr.
— Artyq shyǵynǵa ákep soǵatyn tıimsiz «árleý, ıaǵnı jóndeý» tásilinen bas tartyp, ómir súrý sapasyna tikeleı áser etetin barlyq nysan men júıelerdi túbegeıli jańǵyrtý jumysy júrgiziledi, — dedi Memleket basshysy.
Buǵan deıin habarlanǵandaı, búgin elordada Parlament palatalarynyń birlesken otyrysynda Prezıdent Qasym-Jomart Toqaev Quryltaıdyń aldynda qandaı mindet turǵanyn atady.
