Energetıkalyq ınfraqurylym obektileri kúzet aımaqtarynyń biryńǵaı tsıfrlyq tizilimi qurylady
ASTANA. KAZINFORM — Elimizde energetıkalyq ınfraqurylym obektileri kúzet aımaqtarynyń biryńǵaı tsıfrlyq tizilimi qurylady. Bul jaıynda Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Joǵary voltty elektr berý jelileriniń kúzet aımaqtaryn jáne azamattardyń qaýipsizdigin qamtamasyz etýge qatysty saýaldy qarap, mynany habarlaımyn. Búgingi tańda jer ýchaskelerin ózgelermen kelispeı berý, jobalyq qujattamany kelisý jáne ruqsat berý qujattaryn resimdeý kezinde vedomstvoaralyq ózara is-qımyldyń jetkiliksizdigi, sondaı-aq kúrdeli qurylys obektileriniń kúzet aımaqtarynyń sheginde ornalastyrylýy sııaqty jaǵdaılar baıqalady. Bul elektr jelilerin qaýipsiz paıdalanýǵa baılanysty talaptardyń buzylý qaýpin týdyryp, halyq úshin qaýip tóndiredi, — dedi Premer-mınıstr jaýabynda.
Onyń atap ótýinshe, atalǵan máselelerdi júıeli túrde sheshý retinde energetıkalyq ınfraqurylym obektileriniń kúzet aımaqtarynyń biryńǵaı tsıfrlyq tizilimin qurý kózdelip otyr. Ol jer jáne qala qurylysy kadastrlarynyń memlekettik aqparattyq júıelerine ıntegratsııalanatyn bolady. Bul jer ýchaskeleriniń kúzet aımaqtarymen qıylysýyn avtomattandyrylǵan túrde tekserýdi qamtamasyz etýge múmkindik beredi.
— Sonymen qatar Úkimettiń zańnamalyq bastamasy aıasynda jer ýchaskelerin berý jáne ruqsat berý qujattaryn resimdeý kezinde vedomstvoaralyq kelisý rásimderin kúsheıtý, sondaı-aq táýekelge baǵdarlanǵan tásildi engizý jáne kúzet aımaqtary talaptaryn buzǵany úshin jaýapkershilikti qatańdatý boıynsha jumystar júrgiziletin bolady. Buǵan ákimshilik yqpal etý sharalary men zańsyz salynǵan obektilerdi buzý da kiredi, — dedi Úkimet basshysy.
Oljas Bektenovtiń aıtýynsha, bul sharalardy iske asyrý qoldanystaǵy problemalardy joıýǵa, halyqtyń qaýipsizdigin qamtamasyz etýge, qabyldanatyn sheshimderdiń ashyqtyǵyn arttyrýǵa jáne elektr energetıkasy obektileriniń kúzet aımaqtaryn paıdalaný rejımin buzýdy boldyrmaýǵa baǵyttalǵan.
Buǵan deıin elimizde elektr energetıkasy salasynda 13 ınvestıtsııalyq joba maquldanǵanyn jazǵan edik.
