Germanııada elektromobıl naryǵyn qytaılyq óndirýshiler jaýlap barady
ASTANA. KAZINFORM — 2026 jylǵy qazanda Germanııada 94 myńǵa jýyq jańa elektromobıl tirkeldi. Bul byltyrǵy osy kezeńimen salystyrǵanda shamamen 80%-ǵa kóp, dep habarlaıdy Kazinform DW-ge silteme jasap.
Germanııanyń Federaldyq kólik basqarmasynyń málimetinshe, 2026 jylǵy qazanda elde 254,5 myńǵa jýyq jańa jeńil avtokólik tirkelgen. Onyń 94 myńǵa jýyǵy — tolyqtaı elektr qýatymen júretin kólik.
Al ishten janý qozǵaltqyshy bar avtokólikterge suranys tómendegen. Qazanda mundaı kólikterdiń tirkelgen sany shamamen 62,4 myń bolǵan.
Elektromobılderdiń tanymal bolýyna janarmaıdyń qymbattaýy jáne 2026 jylǵy mamyrda iske qosylǵan memlekettik sýbsıdııa baǵdarlamasy áser etken.
Suranys artqanyna qaramastan, bul úrdisten negizinen sheteldik avtokólik óndirýshileri paıda kórip otyr.
Ásirese, Qytaı kompanııalarynyń kórsetkishi joǵary. EY konsaltıngtik kompanııasynyń dereginshe, Germanııanyń elektromobıl naryǵyndaǵy qytaılyq óndirýshilerdiń úlesi 5,2%-dan 8,4%-ǵa deıin ósken.
Al nemis avtokólik óndirýshileri elektromobıl naryǵyndaǵy úlesinen aıyrylyp jatyr.
Eske salaıyq, buǵan deıin Berlın men Parıj Eýropanyń jańa kólikterge qoıatyn klımattyq talaptaryn qaıta qaraý boıynsha birlesken jospar jóninde kelisimge kelgenin habarlaǵanbyz. Oǵan sáıkes, avtoóndirýshiler jańa kólikteriniń ortasha CO₂ shyǵaryndysyn 2021 jylǵy deńgeımen salystyrǵanda 90%-ǵa tómendetse jetkilikti, al qazirgi EO erejeleri 100%-ǵa tómendetýdi talap etedi.
