Kún energııasy alǵash ret EO-da negizgi energııa kózine aınaldy

ASTANA. KAZINFORM — Maýsym aıynda kún energııasy Eýroodaqtaǵy elektr energııasyn tutynýdyń 22,1%-yn qamtamasyz etti – bul kez kelgen basqa energııa kózinen artyq, dep esepteıdi brıtandyq Ember taldaý ortalyǵy, dep jazdy DW.

Atom elektr stantsııalary 21,8%-dy, al jel týrbınalary 15,8%-dy qamtamasyz etti.

Kún panelderi óndirgen elektr energııasynyń jalpy kólemi 45,4 teravatt-saǵatqa jetti. Bul 340 mıllıon adamdy bir aı boıy elektr qýatymen qamtamasyz etýge jetkilikti – bul Germanııa, Frantsııa jáne Ispanııa halqynyń jalpy sanynan da kóp, dep jazady Der Spiegel.

Bul tek uzaq ári shýaqty jaz kúnderine baılanysty emes – Solar Power Europe qaýymdastyǵynyń málimetinshe, tek 2024 jyldyń ózinde jelige qýaty shamamen 66 gıgavatt bolatyn jańa júıeler qosylǵan.

Kún energetıkasy Eýroodaqta qarqyndy damýda – bul Reseı shıkizatynan bas tartý jáne Qytaıda kún modýlderiniń jappaı óndirisiniń nátıjesinde olardyń baǵasynyń tómendeýimen baılanysty.

Buǵan deıin Germanııada sáýir aıynda kún energııasy negizgi elektr energııa kózine aınalǵanyn jazǵan bolatynbyz.