Energetıkaǵa qajetti súzgileý jabdyqtary endi Astanada óndiriledi

Astanada qazaqstandyq jáne chehııalyq seriktesterdiń yntymaqtastyǵy aıasynda qurylǵan «ZVVZ-KZ» JShS jańa óndiristik kásipornynyń saltanatty ashylý rásimi ótti. Іs-sharaǵa Qazaqstan Respýblıkasy Energetıka vıtse-mınıstri Suńǵat Esimhanov pen Chehııa Respýblıkasynyń Qazaqstandaǵy Tótenshe jáne Ókiletti elshisi Pavol Shepelıak qatysty.

Kásiporynnyń ashylýy QR Energetıka mınıstrligi men «ZVVZ Engineering, a.s.» kompanııasy arasynda 2025 jylǵy 13 qazanda Praga qalasynda qol qoıylǵan energetıka salasyndaǵy ózara túsinistik jáne yntymaqtastyq týraly memorandým aıasynda qol jetkizilgen kelisimderdiń naqty nátıjesi boldy.

Jańa kásiporyn energetıka jáne ónerkásip nysandarynda keńinen qoldanylatyn gaz tazartý jáne ónerkásiptik súzgileý jabdyqtaryn óndirýge mamandanady. Saltanatty rásimde sóz sóılegen Suńǵat Esimhanov jańa óndiristiń iske qosylýy Qazaqstan men Chehııa arasyndaǵy ónerkásiptik kooperatsııany damytýdaǵy mańyzdy qadam ekenin atap ótti.

Onyń aıtýynsha, joba zamanaýı tehnologııalardy jergiliktendirýge, jańa jumys oryndaryn qurýǵa jáne elimizdiń óndiristik áleýetin nyǵaıtýǵa yqpal etedi.

— Osyndaı jobalardy iske asyrý otandyq ónerkásipti damytý, ozyq tehnologııalardy engizý jáne energetıka salasyndaǵy halyqaralyq yntymaqtastyqty keńeıtý jónindegi strategııalyq mindetterge tolyq sáıkes keledi, — dedi vıtse-mınıstr.

Іs-sharaǵa qatysýshylar Qazaqstan men Chehııa arasyndaǵy áriptestiktiń joǵary deńgeıin atap ótip, jańa kásiporynnyń iske qosylýy bolashaqtaǵy birlesken ınvestıtsııalyq jáne óndiristik jobalardy júzege asyrýǵa berik negiz bolatynyna senim bildirdi.

Buǵan deıin Qazaqstan – Chehııa bıznes forýmy aıasynda alty qujatqa qol qoıylǵan edi. Qos memleket endi avıatsııa, energetıka, avtokólik jasaý, taýarlardyń qorabyn, qaptamasyn jáne zattańbasyn óndirý t.b. sektorlarda birlesip jumys istemek.