Energetıkadaǵy ıgi bastama: Toparda jastarǵa arnalǵan turǵyn úı qurylysy bastaldy
QARAǴANDY. KAZINFORM – Qaraǵandy oblysynda iri áleýmettik joba bastaldy – Topar kentinde energetıkalyq saladaǵy jas mamandarǵa arnalǵan eki besqabatty turǵyn úı salynyp jatyr. «Kazakhmys Energy» kompanııasynyń bastamasy – beıindi joǵary oqý oryndaryn bitirgen túlekterdi tartý jáne olarǵa laıyqty turmys pen eńbek jaǵdaıyn jasaýǵa baǵyttalǵan.
«Kazakhmys Energy» JShS-niń bas dırektory Temirlan Ótegenov kadrlyq quramdy jańartý salanyń eń mańyzdy mindetteriniń biri ekenin atap ótti.
– Búgingi tańda energetıkada urpaq aýysymy máselesi ózekti bolyp otyr. Tájirıbeli mamandar zeınetke shyǵady, olardyń ornyn jas kadrlar almastyrýy qajet. Sol maqsatta biz Almaty energetıka ýnıversıteti jáne L.N. Gýmılev atyndaǵy Eýrazııa ýnıversıtetimen birlese jumys isteımiz. Túlekterdi óndiriske tartý úshin 80 páterli eki turǵyn úı qurylysy bastaldy. Jumystardy 15–16 aı ishinde aıaqtaý josparlanyp otyr. Bul tek bastama ǵana: osy sekildi jobalar Balqash pen Jezqazǵanda da júzege asyrylady, - dedi ol.
Qaraǵandy oblysynyń ákimi Ermaǵanbet Bólekpaev turǵyn úı qurylysy bıznestiń áleýmettik jaýapkershiliginiń úlgisi ekenin jáne óńir úshin mańyzdy oqıǵa ekenin aıtty.
– Búgin biz bolashaqqa qadam bastyq, jas energetıkterge arnalǵan eki turǵyn úı qurylysyna alǵashqy adymdy jasadyq. Bul 80 páter – óńirdiń ıgiligi úshin eńbek etýge daıyn mamandarǵa tıesili. Biz úshin Topar jáne Qazaqstannyń basqa ónerkásiptik ortalyqtarynda ómir súrý jáne jumys isteý úshin qolaıly jaǵdaılar jasalýy mańyzdy. Mundaı jobalar áleýmettik turaqtylyqty kúsheıtip, energetık mamandyǵyn jastar úshin tartymdy etedi jáne tikeleı óńirdiń damýyna yqpal etedi, - dedi oblys basshysy.
Saltanatty rásimde bir ǵımarattyń irgetasyna kapsýla salyndy. Temirlan Ótegenovtiń aıtýynsha, joba «Kazakhmys Holding» JShS dırektory keńesiniń tóraǵasy Edýard Ogaıdyń qoldaýymen júzege asyrylyp jatyr.
– Bul tek qyzmetkerlerge qamqorlyq qana emes, sonymen qatar kompanııa men óńirdiń bolashaq damýyn qamtamasyz etetin áleýeti zor mamandardy tartý jáne olardy ustap turýdyń strategııalyq qadamy, - dedi Temirlan Ótegenov.
QR Energetıka vıtse-mınıstri Suńǵat Esimhanov bul oqıǵanyń mańyzdylyǵyn tilge tıek etti.
– Topar MAES-y – Ortalyq Qazaqstandaǵy iri elektr stantsııalarynyń biri, onyń turaqty jumysy el ekonomıkasyna tikeleı áser etedi. Týrbınany iske qosý jáne turǵyn úı qurylysy – energetıka men áleýmettik salanyń keshendi damýyn kórsetetin strategııalyq qadamdar, - dedi Suńǵat Esimhanov.
Kompanııa turǵyn úı qurylysy – kadrlyq áleýetti qoldaýdyń uzaq merzimdi baǵdarlamasynyń bir bóligi ekenin aıtady. Sol sııaqty úıler Qazaqstannyń basqa ónerkásiptik ortalyqtarynda da salynady.
Bul oqıǵalar Memleket basshysy jarııalaǵan Eńbek mamandyqtary jylynda júzege asyrylyp otyr. Osylaısha, jumysshy mamandyqtarǵa qurmet kórsetilip, óńirlerdi damytý baǵytyna saı keledi.