Energetıka: úsh oblysta iri ınvestıtsııalyq jobalar iske asady
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Qytaı Úkimeti arasyndaǵy jańartylatyn energııa kózderi salasyndaǵy jobalardy iske asyrý týraly kelisimdi ratıfıkatsııalaý týraly» Zań maquldandy.
Zańnyń maqsaty - 2024 jylǵy 12 qarashada Bakýde jasalǵan Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasynda qol qoıylǵan kelisimdi ratıfıkatsııalaý.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetine qaraǵanda, kelisim QR aýmaǵynda jańartylatyn energetıka jáne ornyqty damý salasyndaǵy jobalardy yntalandyrý, qurý jáne júzege asyrý arqyly jahandyq klımattyń ózgerýimen tıimdi kúresý úshin Qazaqstan men Qytaıdyń kúsh-jigerin biriktirýge baǵyttalǵan.
Kelisim normalaryna sáıkes, taraptar quqyqtyq, zańnamalyq bazanyń ashyqtyǵyn qamtamasyz etedi, Qazaqstan aýmaǵynda iri jobalardy ázirleýge, qurýǵa, iske asyrýǵa jáne paıdalanýǵa járdemdesedi, olardy iske asyrý úshin tártip, negizgi sharttar men rásimdik máseleler belgilenedi.
Qujatta jel jáne kún elektr stantsııalaryn salý qarastyrylǵan. Osy iri jobalardy iske asyrý Qaraǵandy, Túrkistan jáne Pavlodar oblystaryn qamtıdy. Іri jobalardyń árqaısysy energııa óndirý jáne jınaqtaý úshin keshendi ınfraqurylym qurýdy kózdeıdi. Kelisimge sáıkes iri jobalar úshin elektr energııasyn satyp alý týraly sharttyń qoldanylý merzimi 25 jyldy quraıdy.
Bul jobalardy iske asyrý energetıkalyq qaýipsizdikti qamtamasyz etýge, «jasyl» tehnologııalardy endirýge jáne parnıktik gazdar shyǵaryndylaryn azaıtýǵa yqpal etetin bolady.
Senator Sultan Dúısembınovtiń aıtýynsha, jobalardyń jalpy qýaty 1,8 gıgavatty quraıdy. Mundaı kólemdegi qýat elimizdiń energııa teńgerimindegi «jasyl» elektr energııasynyń úlesin arttyryp qana qoımaı, birqatar óńirlerdiń ınfraqurylymdyq damýyna serpin beredi.
- Zańda iri jobalardy iske asyrýdyń arnaıy tártibi qarastyrylǵan. Bul normalar jobalardyń aýqymy men tehnıkalyq kúrdeliligin eskere otyryp engizilgen sondaı-aq, qarjylyq turaqtylyq, tehnıkalyq múmkindikter jáne jańartylatyn energııa salasyndaǵy dáleldengen tájirıbe sekildi ınvestorlarǵa da naqty talaptar qoıylady. Eń bastysy, bul bastamalar Qazaqstannyń 2030 jylǵa deıin jańartylatyn energııa kózderiniń úlesin arttyrý jónindegi mindetterine jáne 2060 jylǵa qaraı kómirtegi beıtaraptyǵyna qol jetkizý jónindegi strategııalyq maqsattaryna tolyq sáıkes keledi, - dedi depýtat.
Atalǵan úsh jobany 2027-2029 jyldary aıaqtaý josparlanǵan.
Eske salsaq, buǵan deıin Májilis «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy jańartylatyn energııa kózderi salasyndaǵy jobalardy iske asyrý týraly kelisimdi ratıfıkatsııalaý týraly» Zańa qabyldaǵanyn jazǵan edik.
Jobalardy iske asyrýǵa salynatyn ınvestıtsııalardyń jıyntyq kólemi 2,2 mlrd AQSh dollaryn quraıdy.