Energetıka sektoryn jańǵyrtýdyń ulttyq jobasyna tsıfrlyq teńge qoldanylýy múmkin
ALMATY. KAZINFORM — Qazaqstanda 2025-2029 jyldary «Energetıkalyq jáne kommýnaldyq sektorlardy jańǵyrtý» ulttyq jobasy júzege asyrylady.
Almatyda ulttyq jobany talqylaýǵa arnalǵan jıyn ótti. Onda Tabıǵı monopolııalardy retteý komıtetiniń tóraǵasy Tımýr Qosymbaev jobany júzege asyrý barysynda tsıfrlyq teńge qoldanylýy múmkin ekenin aıtty.
— Bastamanyń máni — ulttyq jobany iske asyrýǵa baǵyttalǵan barlyq qarjy tsıfrlyq teńge arqyly belgilenip otyrýy tıis. Onyń basty artyqshylyǵy — ashyqtyq. Biz tapsyrys berýshiden merdigerge deıin qarjynyń qozǵalys tizbegin tolyq baqylaı alamyz. Bul qarjynyń óz maqsatynda jumsalýyn qamtamasyz etip, jumystardyń qunyn negizsiz kóterýge jol bermeıdi. Qazir bastama Ulttyq bankpen birlesip pysyqtalyp jatyr, — dedi Tımýr Qosymbaev.
«Báıterek» ulttyq basqarýshy holdınginiń basqarýshy dırektory Álııa Murzaǵalıeva holdıng jobanyń qarjylyq operatory retinde Ulttyq bankke qarasty uıymmen keńesip jatqanyn aıtty.
— Biz «QazAvtoJol» kompanııasymen de keńesip jatyrmyz. Ótken jyly olar birneshe jobany tsıfrlyq teńge arqyly júzege asyrdy. Qazir sol tájirıbeni zerttep, kezdesken qıyndyqtar men artyqshylyqtardy taldap jatyrmyz. Eń bastysy — deldaldardy alyp tastap, qarjy qozǵalysynyń tolyq ashyqtyǵyn qamtamasyz etý, — dedi ol.
Álııa Murzaǵalıevanyń aıtýynsha, sý jáne jylýmen qamtý salasyndaǵy eki pılottyq joba tańdalyp, onda tsıfrlyq teńgeni engizý tetigi synalady. Nátıjeler taldanǵan soń bul tásildi keńeıtý kózdelip otyr. Bastama 2026 jyly is júzinde qoldanyla bastaıdy.
Eske salaıyq, buǵan deıin mamandar «Qazaqstan kórshi elderge energetıkalyq táýeldilikten qashan aıyrylady» degen suraqqa jaýap berdi.