Energetıka salasyndaǵy jobalarda 12 myńnan astam jumys orny qurylady

NUR-SULTAN. QazAqparat – Búgin Úkimet otyrysynda Indýstrııalandyrý kartasy jobalaryn talqylaý kezinde Energetıka mınıstri Maǵzum Myrzaǵalıev otyn energetıkasy salasyndaǵy jobalar týraly aıtty, dep habarlaıdy QazAqparat tilshisi.

«Indýstrııalandyrý kartasyn iske asyrý aıasynda mınıstrlik oblys ákimdikterimen birlesip, otyn-energetıka kesheni salasynda 4,5 trln teńge quraıtyn 19 jobany iske asyrýda. Respýblıkalyq kartada 4,3 trln teńge somasyna úsh joba kózdelgen. Bul jobalar aıasynda shamamen 12 550 jumys orny qurylady. Onyń ishinde qurylys kezeńinde on bir myńǵa jýyq adam jáne paıdalaný kezeńinde 1 650 adam jumyspen qamtylatyn bolady. 2021 jyly 25 mlrd teńge bolatyn bir joba júzege asyryldy», - dedi M. Myrzaǵalıev.

Onyń aıtýynsha, jalpy somasy 4,3 trln teńge bolatyn 2 joba qazirgi tańda iske asyrylyp jatyr. Sondaı-aq Óńirlik kartada eki júz mlrdteńge somasyna 16 joba kózdelgen. Bul jerde úsh myńǵa jýyq jumys ornyn qurý josparlanyp otyr. Atap aıtqanda, qurylys kezeńinde eki jarym myń adamdy jáne paıdalaný kezeńinde 450-she jýyq adamdy jumyspen qamtý kózdelgen. Búgingi tańda bir joba salynyp bitti. Onyń jalpy somasy 1,9 mlrd teńgeni qurady. 15 joba iske asyrylyp jatyr. Olardyń jalpy somasy – eki júz mlrd teńgege jýyq.

«Onyń ishinde 14 jobany bıyl júzege asyrý josparlanyp otyr. Bir jobany iske asyrý 2022 jylǵa josparlanǵan», - dedi mınıstr.