Energetıka salasyndaǵy ǵylymı-tehnıkalyq áleýetti damytý qajet - N.Nazarbaev
ASTANA. QazAqparat - Energetıka salasyndaǵy ǵylymı-tehnıkalyq áleýetti damytý qajet. Bul týraly búgin elordada ótken Sheteldik ınvestorlar keńesiniń 30-shy jalpy otyrysynda QR Prezıdenti Nursultan Nazarbaev aıtty, dep habarlaıdy QazAqparat.
«Energetıka salasyndaǵy menshikti ǵylymı-tehnıkalyq áleýetti damytý, ǵylymı qoldanbaly zertteýler júrgizý, mamandardy oqytý ári daıyndaý úshin jaǵdaılar jasaý qajet. Munymen beıindi mınıstrlikter, ýnıversıtetter, Halyqaralyq «jasyl» tehnologııalar ortalyǵy men ınvestorlar belsendi aınalysýy tıis. Bul máselede Sheteldik ınvestorlar keńesi óz úlesin qosa alatyndyǵyna senimdimin», - dedi Qazaqstan Prezıdenti.
Aıta keteıik, Sheteldik ınvestorlar keńesi Qazaqstan Prezıdentiniń tóraǵalyǵymen ótetin keńesshi-konsýltatıvti organ bolyp sanalady. Keńes 1998 jyly eldegi ınvestıtsııalyq qyzmet pen ınvestıtsııalyq ahýaldy jaqsartýmen tikeleı baılanysty ózekti máselelerdi tıimdi sheshý úshin memleket pen sheteldik ınvestorlar arasyndaǵy tikeleı únqatysýdy qamtamasyz etý maqsatynda qurylǵan. Eldiń ınvestıtsııalyq saıasaty men ekonomıkalyq damýynyń basty aspektileri boıynsha Qazaqstan Prezıdenti men Úkimetiniń qaraýyna usynymdar men usynystardy ázirleý Keńestiń basty mindeti sanalady.
