Energetıka salasynda tájirıbe almasý úshin alty eldiń mamandary Astanaǵa keldi

ASTANA. QazAqparat - Búgin Elordadaǵy «KEGOC» elektr jelilerin basqarý jónindegi kompanııada TMD memleketterindegi energetıkalyq qadaǵalýǵa jaýapty memlekettik organdardyń seriktestigin úılestirý boıynsha komıssııanyń 11-inshi otyrysy ótýde. Onda Ázerbaıjan, Belarýs, Qyrǵyzstan, Moldova men Reseı Federatsııasynyń mamandary energetıka salasyndaǵy ózderiniń jetistikterimen bólisýde, dep habarlaıdy «QazAqparat» HAA tilshisi.

Sońǵy shırek ǵasyrda TMD-nyń ár eli energetıka salasynda óz jolymen ketkeni belgili. Biraq, qurylǵylar áli kúnge deıin ortaq. Sondyqtan, tájirıbe almasý barlyǵyna da mańyzdy. Jıynda talqylanyp jatqan ekinshi suraq - elektr jelilerine tutynýshylardyń tıimdi sharttarmen qosylý máselesin talqylaý. Bul turǵyda sońǵy jyldary energetıka salasyna birshama ózgeristerdi engizgen Qazaqstannyń tájirıbesine atalǵan elderdiń barlyǵy da qyzyǵýshylyq tanytyp otyr.

«Jylyna eki ret jınalyp, baqylaý salasynda qandaı máseleler bar, olardy qalaı sheshý kerek, qazir ár memlekette bekitilgen energetıka salasyndaǵy erejelerdiń qaısysy tıimdi ekenin talqylap jatyrmyz. Bıyl áriptesterdi «EKSPO-2017» halyqaralyq kórmesine tuspa-tus tamyz aıyna arnaıy shaqyryp otyrmyz. Búgin energetıka salasyndaǵy eki erejeni talqylaımyz. Kásipkerlerdiń elektr júıelerine qosylý máselesi jóninde aqyldasamyz. Sonymen birge, reseılik áriptester Máskeý qalasynyń tájirıbesimen bóliskeli jatyr. Biz de «KEGOC» kompanııasyndaǵy óz jumysymyzdyń nátıjesin  kórsetemiz», - deıdi QR Energetıka mınıstrligi atomdyq jáne energetıkalyq baqylaý komıtetiniń tóraǵasy Suńǵat Esimhanov.

Komıtet tóraǵasynyń sózine súıensek, burynǵy kórshiles memleketterdiń energetıkalyq qurylǵylary bir-birine uqsaıdy. Biraq, ony taratý júıesinde aıtarlyqtaı aıyrmashylyq bar. Máselen, Belarýs elinde búkil energetıka salasy memlekettik menshikte. Al Reseıde energetıkanyń qýat naryǵy bar. Qyrǵyz áriptesterde sý elektr stansasy damyǵan. Osy sebepti, búgingi jıynda energetıkadaǵy tájirıbe almasýdyń oraıy kelip tur.

Aıta keterligi, TMD memleketterindegi energetıkalyq qadaǵalaýǵa jaýapty memlekettik organdardyń seriktestigin úılestirý boıynsha komıssııa 2012 jyly qurylǵan bolatyn. Sońǵy bes jylda komıssııa músheleri Máskeýde, Bishkekte, Mınskide, Kıshınevte kezdesý ótkizgen. QR Energetıka mınıstrligi atomdyq jáne energetıkalyq qadaǵalaý men baqylaý komıtetiniń tóraǵasy Suńǵat Esimhanovtyń aıtýynsha,  búgingi jıynǵa da tájirıbe almasý baǵytyndaǵy kelesi qadam dep baǵa berýge bolady.