Energetıka salasyna maman toqtamaı jatyr - vıtse-mınıstr

NUR-SULTAN. QazAqparat – Energetıka mınıstrligi salaǵa maman toqtamaı ketkenine alańdaýly, dep habarlaıdy QazAqparat.

Energetıka vıtse-mınıstri Qaırat Rahımovtyń aıtýynsha, keıingi 4 jylda energetıka salasynan 3 myń maman ketken.

«Elektr energetıkasyndaǵy eńbekaqynyń tómen deńgeıi mamandardyń basqa salalarǵa ketýine ákeledi. Elektr jáne jylý energııasyn óndirý sektory - joǵary bilikti mamandardy talap etetin óte kúrdeli protsess. Salanyń bir ereksheligi, tipti eń tómengi laýazymdarda da arnaıy bilimdi talap etedi. Búgingi kúni biz mamandardyń ónerkásiptiń basqa salalary men shekaralas memleketterge ketýin baıqap otyrmyz», - dedi Rahımov Ortalyq kommýnıkatsııalar qyzmeti alańynda ótken brıfıng barysynda.

Vıtse-mınıstr mundaǵy negizgi sebep – elektr energetıkasyndaǵy eńbekaqy tómendigi dep otyr.

Al maman tapshylyǵy nysandardy tapsyrý men paıdalanýǵa berý merziminiń buzylýyna tap keltiretin kórinedi.

«2016 jyly Qazaqstannyń negizgi elektr stansalarynda óndiristik personaldan 26 myńnan astam adam jumys istese, 2020 jyldyń qorytyndysy boıynsha óndiris kóleminiń 15% ulǵaıǵanyna qaramastan, olardyń sany 23 myń adamnan aspaıdy», - dedi Qaırat Rahımov.