Energetıka salasyndaǵy memlekettik satyp alýda otandyq ónimniń kólemi artyp keledi
ASTANA. KAZINFORM – Byltyr memlekettik satyp alýdaǵy otandyq taýarlardyń úlesi 65%-ǵa jetken. Bul jóninde QR Energetıka vıtse-mınıstri Erlan Aqbarov Májiliste ótken taqyryptyq otyrysta málimdedi.
– Óndiristik áleýetti nyǵaıtý, otandyq óndiristi qoldaý jáne jergilikti qamtýdy damytý bul tek ekonomıkalyq mindet emes, bul – uzaqmerzimdi turaqtylyqtyń jáne tehnologııalyq táýelsizdiktiń negizi. Osy baǵytta mınıstrlik júıeli túrde jer qoınaýyn paıdalanýshylarmen jumys júrgizip jatyr. Negizgi maqsat – satyp alýlarda jergilikti qamtý úlesin arttyrý ǵana emes, naqty óndiristerdi qalyptastyrý, tehnologııalardy el ishinde damytý jáne qosylǵan qundy Qazaqstanda qaldyrý. 2025 jyldyń qorytyndysyna saı, saladaǵy mınıstrlik boıynsha satyp alý kólemi 4,6 trln teńge boldy. Onyń ishinde «elishilik qundylyq» úlesi 65% kórsetkishke jetti. Bul – oń dınamıka, - dedi Aqbarov.
Aıta keteıik buǵan deıin qazaqstandyq óndirýshilerdiń memlekettik satyp alý kólemi qanshaǵa jetkenin jazǵanbyz.
