Energetıka salasyndaǵy yntymaqtastyq: Qazaqstan-Túrkııa qatynastary damyp keledi
ASTANA. KAZINFORM – Atalǵan sektorda kóptegen ortaq joba júzege asyrylyp jatyr. Bul jóninde QR Energetıka vıtse-mınıstri Sanjar Jarkeshov málimdedi.
– Qazaqstan munaıyn eksporttaý marshrýttaryn ártaraptandyrý jalǵasyp keledi. Baký-Tbılısı-Djeıhan qubyry arqyly munaı eksporty ulǵaıýda. Soǵan Túrkııa memleketi alǵysyn aıtty, – dedi ol.
Sondaı-aq, geologııalyq barlaý baǵytyna da aıtarlyqtaı basymdyq beriledi.
– «QazMunaıGaz» ulttyq kompanııasy men Turkish Petroleum korporatsııasy ózara is-qımyl jónindegi kelisimshartqa qol qoıdy. Ondaǵy úsh joba geologııalyq barlaýǵa qatysty, – dedi vıtse-mınıstr.
Odan bólek, elektr energetıkasy da nazardan tys qalmaıdy.
– Elektr energetıkasy salasynda da biraz jumys atqarylyp jatyr. Máselen, Aksa Energy degen túrik kompanııasy Qyzylordada qýaty 240 megavattyq qondyrǵy salyp jatyr. Ol da – sátti joba, – dedi Jarkeshov.
Aıta keteıik, buǵan deıin Qazaqstan men Túrkııa ǵalymdary aýyl sharýashylyǵy salasynda birlesip zertteý júrgizip jatqanyn jazǵanbyz.
