Energetıka salasyndaǵy árbir altynshy qyzmetker jumys istegen alǵashqy jyly-aq ketip qalady — salalyq zertteý
ASTANA. KAZINFORM — Elektr energetıkasy salasynyń ókilderi tarıfterdiń eńbekaqy bóligin qalyptastyrýda biryńǵaı tásildi engizý qajettigin málimdedi. Strategııalyq óndiristegi kadr máselesine qatysty tolǵandyrǵan saýaldaryn olar 29 sáýirde ótken «Amanat» partııasynyń kásipkerlik qanatymen kezdesýde ortaǵa saldy.
«Ortalyq-Azııa Elektroenergetıkalyq Korporatsııasynyń» aktsıoneri Sergeı Kan úsh iri energetıkalyq holdıngte («Samuryq-Energo» AQ, «Qazaqstandyq kommýnaldyq júıeler» JShS jáne «OAEK» AQ) júrgizilgen kadr kórsetkishteriniń zertteý nátıjelerin usyndy. Zertteý jalpy sany 27 kompanııany, 31 myń qyzmetkerdi, ıaǵnı búkil sala kadrlarynyń úshten birine jýyǵyn qamtydy.
— Energetıkadaǵy kadr máselesi — bul jekelegen qıyndyq emes, bul tutas júıeniń senimdiligine tikeleı áser etetin faktor, — dep atap ótti Sergeı Kan.
Zertteý qorytyndysy boıynsha, sońǵy úsh jylda energetıkadaǵy kadrlar turaqsyzdyǵy 15%-dan asyp ketken, al árbir altynshy maman jumysqa ornalasqan alǵashqy jyly-aq óz erkimen ketedi. Sala áli de kadrlardyń qartaıýymen sıpattalady: ortasha jas 50-ge jaqyndap qaldy, 60 jastan asqan qyzmetkerlerdiń úlesi 10%-ǵa jetti, al jas mamandardyń úlesi kerisinshe azaıyp barady. Jastar ne energetıka salasyn múldem tańdamaıdy, ne jumys istegen alǵashqy jyly-aq basqa salaǵa aýysyp ketedi.
Elimizdiń bes beıindi ýnıversıtetinen alynǵan sońǵy úsh jyldaǵy málimetter de kóńil kónshitpeıdi: mamandyq boıynsha oqıtyn stýdentter sany 2023 jyldan 2025 jylǵa deıin 37%-ǵa qysqarǵan.
— Sonymen qatar, tek «Ortalyq-Azııa Elektroenergetıkalyq Korporatsııasy» kompanııalar tobynda «PROFENERGY» baǵdarlamasy qolǵa alynǵan 9 jyl ishinde 4 795 stýdent pen kásiporynnyń 1 379 qyzmetkeri bilim alýǵa jáne kásibı damýǵa qoldaý tapty, — dep atap ótti OAEK aktsıoneri.
Qyzmetkerler jumystan ketýdiń basty sebebi retinde qarjylyq jaǵdaıdy ataıdy.
Qoldanystaǵy tarıftik retteý modeline sáıkes, energetıkter eńbekaqy qoryna (EQQ) jumsalatyn shyǵyndardy tabıǵı monopolııa sýbektisiniń tarıfine qyzmetkerlerdiń naqty sanyna qaraı eseptep engizýge mindetti. Jyl saıyn jumysshylar sany azaıyp, sonyń saldarynan eńbekaqy qory da jyldan-jylǵa qysqaryp otyr. Saldarynan kásiporyndar mamandardy tartý jáne olardy ustap qalý múmkindiginen aıyrylyp, kadrlardyń ketýine jol berip otyr.
Energetıkterdiń salalyq qaýymdastyǵy memlekettik deńgeıde tabıǵı monopolııa sýbektileriniń eńbekaqy qoryn qalyptastyrý kezinde normatıvtik sandy esepke alý ádistemesin ázirlep, bekitýdi usynady. Sondaı-aq, memlekettik retteý júıesinde qyzmetkerlerge jumsalatyn ruqsat etilgen shyǵyndar tizbesin keńeıtýdi, sonyń ishinde saýyqtyrý tólemderin, oqý demalystaryn tóleýdi, biliktilikti arttyrýdy jáne turǵyn úımen qoldaýdy engizýdi suraıdy.
Búginde Qazaqstannyń energetıka salasynda 100 myńǵa jýyq adam eńbek etedi. El ekonomıkasynyń turaqtylyǵy men halyqtyń ómir súrý sapasy tikeleı osy jandardyń jumysyna baılanysty: úılerdegi jylý, kásiporyndardyń jumysy, qalalardyń jaryǵy, aýrýhanalar men strategııalyq nysandardyń irkilissiz elektr qýatymen qamtylýy — osynyń bári energetıkterdiń qajyrly eńbeginiń nátıjesi.
