Energetıka nysandaryndaǵy tehnologııalyq protsesterdi basqarý júıeleri jańartylady
ASTANA. KAZINFORM – «Energetıkalyq jáne kommýnaldyq sektorlardy jańǵyrtý» ulttyq jobasyn iske asyrý sheńberinde Energetıka mınıstrligi tehnologııalyq protsesterdi basqarý júıelerin kezeń-kezeńimen jańartý jáne zııatkerlik tehnologııalardy engizý maqsatynda energetıka nysandaryndaǵy olardyń qazirgi jaı-kúıine baǵalaý júrgizdi.
Jumys barysynda qoldanystaǵy basqarý júıeleriniń tsıfrlyq jetilý deńgeıi taldandy, tehnologııalyq jáne aqparattyq táýekelder anyqtaldy, sondaı-aq jasandy ıntellekt tehnologııalaryn qoldana otyryp, olardy odan ári damytý baǵyttary aıqyndaldy.
Tehnologııalyq parametrlerdi zııatkerlik monıtorıngileý, jabdyqtardyń isten shyǵýyn boljaý, jumys rejımderin ońtaılandyrý jáne energııamen jabdyqtaýdyń senimdiligin arttyrý úshin jasandy ıntellektti (JI) paıdalaný múmkindikterine erekshe nazar aýdaryldy. Dıspetcherlik basqarý jáne kıberturaqtylyqty qamtamasyz etý júıelerinde úlken derekter taldamasy men mashınalyq oqytý algorıtmderin qoldaný tásilderi qaraldy.
Alynǵan nátıjeler basqarý júıelerin jańǵyrtýdyń biryńǵaı tehnıkalyq talaptaryn ázirleýge jáne Qazaqstan Respýblıkasynyń energetıka kesheninde zııatkerlik sheshimderdi aýqymdandyrýǵa negiz bolady.
Atalǵan is-sharalardy iske asyrý apattyq jaǵdaılardy azaıtýǵa, energııa nysandaryn paıdalaný tıimdiligin arttyrýǵa jáne salanyń zamanaýı tsıfrlyq ınfraqurylymyn damytýǵa baǵyttalǵan.
Eske salsaq, osyǵan deıin Qazaqstan, Qyrǵyzstan jáne Ózbekstan sý-energetıkalyq yntymaqtastyqty kúsheıtýdi josparlap otyrǵanyn jazǵanbyz.