Energetıka naryǵyndaǵy qubylmalylyq: Qazaqstan ınvestıtsııa tartý men dekarbonızatsııany qatar júrgizbek
ASTANA.KAZINFORM - Energetıka mınıstri Erlan Aqkenjenov Eurasian Energy baǵyty boıynsha vıtse-prezıdent Mettıý Seıgers bastaǵan halyqaralyq S&P Global agenttiginiń delegatsııasymen kezdesti, dep habarlaıdy QR Energetıka mınıstrliginiń baspasóz qyzmeti.
Kezdesýdiń negizgi taqyryptary jahandyq saýda aǵyndarynyń transformatsııasy, energetıkalyq naryqtardaǵy baǵa qubylmalylyǵy jáne álemdik energetıkalyq aýysymnyń perspektıvalary boldy.
QR Energetıka mınıstri kómirsýtek shıkizaty aldaǵy uzaq jyldar boıy jahandyq energetıkalyq qaýipsizdiktiń negizi bolyp qala beretinin atap ótti.
Qazirgi ekonomıkalyq syn-qaterler jaǵdaıynda Qazaqstan úshin energetıkalyq qaýipsizdikti qamtamasyz etý, munaı-gaz keshenine ınvestıtsııalar tartý jáne ekonomıkany kezeń-kezeńimen dekarbonızatsııalaý basymdyq bolyp qala beredi. Sonymen qatar respýblıka sheteldik seriktester úshin senimdi ári boljamdy energııa resýrstaryn jetkizýshi mártebesin dáıekti túrde nyǵaıta otyryp, óziniń saralanǵan baǵytyn jalǵastyryp keledi.
Taraptar AQSh-tyń Hıýston qalasynda ótken CERAWeek 2026 bedeldi analıtıkalyq alańynyń nátıjelerin, sondaı-aq forým aıasynda qazaqstandyq taraptyń agenttiktiń vıtse-tóraǵasy Denıel Ergınmen júrgizgen kelissózderiniń qorytyndylaryn joǵary baǵalady.
Kezdesý qorytyndysy boıynsha Erlan Aqkenjenov pen Mettıý Seıgers aqparattyq-taldamalyq áriptestikti odan ári damytýǵa daıyn ekendikterin rastady. Birlesken jumystyń negizgi baǵyttary retinde munaı-gaz sektoryndaǵy makroekonomıkalyq boljaý jáne jahandyq ınvestıtsııalyq trendterge saraptamalyq baǵa berý aıqyndaldy.
Osyǵan deıin Energetıka mınıstrligi men EQDB «QaJET» ınvestıtsııalyq platformasyn iske qosatyny týraly jazdyq.
