Energetıka mınıstrligi júk kóligi júrgizýshileri tóbelesken vıdeodaǵy aqparatty joqqa shyǵardy
Energetıka mınıstrligi taratylǵan aqparattyń mazmuny, atap aıtqanda, «Almaty AJQS-da dızel otyny saldarynan júk tasýshylar tóbelesti» degen tezıs shyndyqqa janaspaıtynyn málimdeıdi.
«Bul oqıǵa 2022 jylǵy 31 tamyzda saǵat 19-40-ta Almaty qalasynda emes, Jambyl oblysy Qordaı aýylynda ornalasqan «Helios» JShS-nyń AJQS-daǵy klıentteri arasynda bolǵan. Tóbelestiń sebebi - óz kezegin kútý kezinde janarmaı quıý stantsııasynyń klıentteri arasyndaǵy aýyzsha janjal. AJQS basqa klıentteriniń aralasýynyń arqasynda janjal birden toqtatyldy, tóbeles AJQS jumysyna jáne basqa klıentterge áser etpedi, daýǵa qatysýshylardyń eshqaısysy polıtsııaǵa júgingen joq», - dep jazdy vedomstvodan.
Oqıǵa 31 tamyzda oryn alǵanyna qaramastan, búgin jekelegen elektrondyq aqparattyq resýrstarda jarııalanǵan. Sondyqtan, Helios operatorlary egjeı-tegjeıli tekserý júrgizip, oqıǵaǵa qatysqan klıentterimen baılanysqa shyqty jáne oryn alǵan daýdyń naqtylanǵan derekterin Energetıka mınıstrligine usyndy.
Esterińizge sala keteıik, dızel otyny máseleleri boıynsha azamattardyń shaǵymdary men ótinishterin qabyldaý úshin Energetıka mınıstrligi men iri AJQS jelileri táýlik boıy jumys rejıminde «jedel jelini» iske qosty.
Ótinishterdiń eń kóp bóligi, atap aıtqanda 50%-dan astamy WhatsApp-arnasy arqyly kelip jatyr. Ótken kúnderi jedel jelige túsken ótinishterdiń úlken aǵyny baıqalǵan joq, Energetıka mınıstrliginiń «jedel jelisi» jumys isteı bastaǵannan beri barlyǵy 150 ótinish boıynsha jumys júrgizildi.
