Energetıka mınıstrligi Taldyqorǵanda et óńdeý zaýytyn salýǵa tyıym saldy
NUR-SULTAN. QazAqparat - QR Energetıka mınıstrligi Ekologııalyq retteý jáne baqylaý komıtetiniń Almaty oblysy boıynsha ekologııalyq departamenti Taldyqorǵanda et óńdeý zaýytyn salýǵa tyıym saldy, dep habarlaıdy QazAqparat tilshisi.
Energetıka mınıstrliginen habarlaǵandaı, saraptamaǵa Taldyqorǵan qalasyndaǵy Shyǵys ónerkásiptik aımaǵynda «Et óńdeý zaýytyn salý» jobasy qaraýǵa kelip túsken. Joba boıynsha nysandy Qaratal ózeninen 638 metr jerge salý kózdelgen. Kásipkerler táýligine 200 iri qara mal jáne 1000 usaq mal soıý úshin zaýyt salýdy josparlaǵan. Biraq ol turǵyn úı aımaǵynan nebári 900 metr qashyqtyqta ornalasýy tıis boldy.
«Osy joba Departament janyndaǵy saraptama keńesiniń otyrysynda memlekettik organdardyń jáne qoǵamdyq uıymdardyń qatysýymen qaraldy. Ulttyq ekonomıka mınıstrligi belgilegen sanıtarlyq-epıdemıologııalyq talaptarǵa sáıkes, et óńdeý kásiporynǵa sanıtarlyq qorǵanysh aımaǵy 1000 metrdi quraıdy. Osyǵan baılanysty, QR Energetıka mınıstrligi Ekologııalyq retteý jáne baqylaý komıtetiniń Almaty oblysy boıynsha Ekologııalyq departamenti jobany iske asyrýdan bas tartyp, nysandy qaladan tys jerde salý týraly máseleni kóterdi», - dep habarlady Energetıka mınıstrliginen.
