Energetıka mınıstrligi: Halyqaralyq qarjy uıymdary kómir stansalarynyń qurylysyn qarjylandyrýdan bas tartyp otyr

NUR-SULTAN. QazAqparat – Halyqaralyq qarjy uıymdary kómir stansalarynyń qurylysyn qarjylandyrýdan bas tartyp otyr. Ortalyq kommýnıkatsııalar qyzmetinde ótken brıfıngide QR Energetıka mınıstrligi elektr energetıkasyn damytý departamentiniń dırektory Aıdos Dáribaev osyndaı málimet aıtty, dep habarlaıdy QazAqparat tilshisi.

«Jańartylatyn energııa kózderiniń turaqsyzdyǵyn eskersek, bizge eldiń energııa júıesindegi bazalyq kózderdi qarastyrý kerek. Halyqaralyq qarjy uıymdary kómir stansalaryn salý jobalarynan búkil jerde bas tartyp jatqandyqtan kómir generatsııasyn ári qaraı engizý múmkindigimiz shektelip otyr. Osyǵan baılanysty jıyntyq qýaty 2,4 GVt bolatyn atom elektr stansasy bazalyq generatsııanyń jańa kózi retinde qarastyrylyp otyr», - dedi mınıstrlik ókili.

Sondaı-aq, ol 2035 jylǵa qaraı Qazaqstanda iske qosylýy josparlanǵan energetıkalyq qýattardyń qurylymy týraly málimet usyndy.

«2035 jylǵa qaraı 6,5 GVt jańartylatyn energııa kózderin, 5 GVt-tan astam gaz generatsııasyn, 2 GVt sý generatsııasyn, 1,5 GVt kómir generatsııasyn, 2,4 GVt atom generatsııasyn salý kózdelgen. Bul bizge bazalyq qýattardyń da, retteýshi qýattardyń da tapshylyǵyn tómendetýge múmkindik berip, eldiń energııa júıesin shektes elderdiń retteýinen táýelsiz etedi», - dedi departament dırektory.

Aıtýynsha, bul jospar 2035 jylǵa deıingi elektr energııasyn óndirýdiń boljamy boıynsha, kómirdiń úlesi 40 paıyzǵa deıin azaıtýǵa tıis.

«Qazir onyń úlesi shamamen 70 paıyzdaı. Al jańartylatyn energııa kózderiniń úlesi 23 paıyzǵa deıin, gaz generatsııasynyń úlesi 18 paıyz, sý elektr stansalarynyń úlesi 7 paıyz, AES úlesi 12 paıyz bolady», - dedi Aıdos Dáribaev.