Energetıka mınıstrligi gaz eksportynyń tómendeý sebebin atady

NUR-SULTAN. QazAqparat - 2019 jyldyń 10 aıynda Qazaqstannyń gaz eksporty kólemi tómendedi. Bul týraly búgin Úkimet otyrysynda elimizdiń 10 aıdaǵy áleýmettik-ekonomıkalyq damý qorytyndysy jaıynda baıandaǵan QR Energetıka birinshi vıtse-mınıstri Mahambet Dosmuhambetov aıtty, dep habarlaıdy QazAqparat tilshisi.

«Bıyldyń 10 aıy ishinde gaz óndirý kólemi 46,3 mlrd tekshe metrdi qurady. Bul 2018 jyldyń tıisti kezeńinen 1,5 jáne 10 aıdyń josparynan 2,8 paıyz artyq», - dedi ol.

Onyń dereginshe, taýarlyq gaz óndirý kólemi 27,12 mlrd tekshe metr boldy. Bul 2018 jyldyń 10 aıyndaǵy kórsetkishtiń 98,6 paıyzyna teń. Taýarlyq gazdy ishki tutyný kólemi 11,8 mlrd tekshe metrdi qurap, 2018 jyldyń uqsas kezeńimen salystyrǵanda 3 paıyzǵa ósken.

«Gaz eksporty 15,3 mlrd tekshe metr nemese 2018 jyldyń tıisti kezeńine 91,1 paıyzdy qurap otyr. Eksport kóleminiń tómendeýi gazdy ishki tutynýdyń ulǵaıýyna baılanysty boldy. Aǵymdaǵy jyldyń 10 aıy ishinde suıytylǵan munaı gazyn óndirý kólemi 2,6 mln tonnany qurady», - dedi birinshi vıtse-mınıstr.