Energetıka mınıstrligi elimizdegi jylý qazandyqtarynyń daıyndyǵy boıynsha esep berdi

ASTANA. QazAqparat - Energetıka vıtse-mınıstri Jandos Nurmaǵanbetov jylý berý maýsymyna daıyndyq aıasynda elimizdegi qazandyqtardyń jaǵdaıy boıynsha túsinik berdi, dep habarlaıdy QazAqparat tilshisi.

«Qazir «Rıdder jylý elektr ortalyǵy» aktsıonerlik qoǵamynda merdiger uıymdar barlyq 6 qazandyq boıynsha jóndeý jumystaryn atqaryp jatyr. 6 qazandyqty kúrdeli jóndeýge Úkimet rezervinen qarajat bólindi. Bul baǵyttaǵy jumystardy jedeldetý qajet dep sanaımyz», - dedi J. Nurmaǵanbetov Úkimet otyrysynda.

Onyń aıtýynsha, Ekibastuz jylý elektr ortalyǵynyń senimdi jumysyn qamtamasyz etý aıasynda aldaǵy jylý berý maýsymynda 10 qazandyqty jóndeý eskerilgen. 5 qazandyqty jóndeý jeke kompanııanyń esebinen, qalǵan beseýi bıýdjet arqyly iske asyrylyp jatyr.

«Jezqazǵan jylý elektr ortalyǵynda №4 qazandyqty jóndeýdi jedeldetý, sondaı-aq energetıkalyq jabdyqtyń barlyq josparlanǵan jóndeý jumystarynyń oryndalýyn qamtamasyz etý qajet. Budan bólek, batys óńirde MAEK-tiń ekinshi jylý elektr ortalyǵynda týrbına jóndeý keshegip jatyr», - dedi vıtse-mınıstr.

Shahtınsk jylý elektr ortalyǵynda №3 qazandyqty kúrdeli jóndeý keshigip, artta qaldy. 10 jyldan astam ýaqyt boıy qazandyqtar men týrbınalarǵa tolyq kúrdeli jóndeý júrgizilmegen.

«Stepnogorsk jylý elektr ortalyǵynyń senimdi jumysyn qamtamasyz etý aıasynda aldaǵy jylý berý maýsymynda úsh qazandyqty jóndeý eskerilgen. Energetıkalyq kásiporynnyń menshik ıesi kúrdeli jóndeýge 2 mlrd teńge bóldi. Sonymen qatar, Kentaý jylý elektr ortalyǵynyń qazandyqtaryn keńeıtilgen jóndeý 2015 jyly, al kúrdeli jóndeý tek 2012 jyly júrgizilgen. Bıyl eki qazandyqty qaıta jańartý jáne tórt qazandyqty aǵymdaǵy jóndeý josparlanǵan. Oblystyq bıýdjetten shamamen 3 mlrd teńge bólindi. Al «Arselor Mıttal Temirtaý» aktsıonerlik qoǵamynyń ekinshi jylý elektr ortalyǵynyń №4 qazandyǵyn jóndeýdi aıaqtaý merzimi qazan aıynyń sońyna deıin uzartylady. № 7 qazandyqti iske qosý basym mindet bolǵandyqtan, ony paıdalanýǵa berýdi jedeldetý qajet dep sanaımyz», - dedi Jandos Nurmaǵanbetov.