Energetıka mınıstrligi elektrmen jabdyqtaý senimdiligin arttyratyn zań jobasyn usyndy
Qujatty búgin Úkimettiń selektorlyq rejimdegi otyrysynda elimizdiń Energetıka mınıstri Qanat Bozymbaev tanystyrdy, dep habarlaıdy QazAqparat.
«Qazaqstan Respýblıkasynyń keıbir zańnamalyq aktilerine elektr energetıkasy máseleleri boıynsha ózgerister men tolyqtyrýlar engizý týraly» zań jobasyn usynamyz. Energetıka mınıstrligi osy zań jobasyn 51-shi qadamda aıqyndalǵan mindetterdi iske asyrý maqsatynda ázirledi. Bul óńirlik elektr jelilik kompanııalardy irilendirý máseleleri boıynsha. Aǵymdaǵy jyldyń 7 qazanynda QR Úkimetiniń janyndaǵy Zań jobalaý qyzmeti jónindegi vedomstvoaralyq komıssııa 410-shy otyrysynda zań jobasynyń jańartylǵan tujyrymdamasy jańartyldy», - dedi mınıstr.
Onyń aıtýynsha, atalǵan tujyrymdamada óńirlik jelilik kompanııalardy irilendirýge baǵyttalǵan negizgi tásilder kózdelgen. Zań jobasy ıesiz jatqan elektr jelileriniń máselesin sheshedi. Búginde elimizde 4580 shaqyrymnan artyq ıesiz jeli bar. Munan bólek, 1300-den astam transformatorlyq shaǵyn stansalar da ıesiz qalýda. Zań jobasy qabyldanǵannan keıin olar elektr taratý uıymdarynyń balansyna jeńildetilgen sharttarmen beriledi.
Usynylyp otyrǵan ózgertýler elimizdi elektr energııasymen jabdyqtaý senimdiligin arttyra túsetin bolady. Sonymen qatar óńirlerge elektr energııasyn berý kezindegi shyǵyndardy jáne tutynýshylarǵa beriletin energııa qunyn tómendetýge múmkindik beredi.
