Energetıka mınıstrligi dıqandarǵa jeńildetilgen otyn ýaqytyly jetkiziletinin aıtty
«Aýyl sharýashylyǵynyń kóktemgi qajettiligi 370 myń tonna kóleminde qarastyrylyp otyr. Onyń ishinde, Atyraý munaı óńdeý zaýyty - 92,3 myń tonna, Pavlodar munaı-hımııa zaýyty - 195,6 myń tonna, Shymkent munaı óńdeý zaýyty - 87,1 myń tonna. Biz qazir keste qabyldap, ony oryndaý úshin Aýyl sharýashylyǵy mınıstrligi men resýrs ıelenýshilerge jiberdik. Qazirgi jaǵdaı boıynsha naýryzdaǵy jospardyń oryndalýy 49 paıyz bolyp otyr nemese shamamen 56 myń tonna kólemindegi dızel aýyl sharýashylyǵy úshin tıeldi», - dedi vıtse-mınıstr.
Onyń aıtýynsha, 2018 jyldyń naýryzynda kóktemgi egis jumystaryn júrgizý úshin dızelge mınıstrlikpen usynylatyn baǵa 1 tonnasyna 156 myń teńgeni nemese lıtrine 130 teńgeni quraıdy. Al ishki naryqta ortasha kóterme baǵa 1 tonnasyna 170 myń teńge bolyp otyr.
«Osylaısha kóktemgi egis jumystaryna dızeldiń baǵasy ortasha naryqtyq baǵamen salystyrǵanda tonnasyna 14 myń teńgege tómen. Osy rette eskeretin bir jaıt bar. Aýyl sharýashylyǵyna arnalǵan dızeldiń arzandatylǵan baǵasyn zańdy túrde bekitý Energetıka mınıstrliginiń quzyretine kirmeıdi. Kóktemgi egis jumystarynyń mańyzyn eskere otyryp, aýyl sharýashylyqtaryna dızeldiń der ýaqytynda jetkizilýine ádettegideı basymdyq berip otyrmyz. Bul másele mınıstrliktiń jiti qadaǵalaýynda. Osylaısha kóktemgi egis jumystaryn tıimdi júrgizý úshin jan-jaqty sharalar qabyldanǵanyn jetkizgim keledi»,- dedi Maǵzum Myrzaǵalıev.
Sonymen qatar Maǵzum Myrzaǵalıev «Petroprox» jaýapkershiligi shekteýli seriktestigi tarapynan Almaty oblysynyń operatorlaryna aqpan-naýryz aılary úshin 3,7 myń tonna dızel otynyn jetkizbeý máselesin mınıstrlik biletindigin atap ótti.
«Bul másele týraly biz bilemiz. Ol másele aıdyń aıaǵyna deıin óz sheshimin tabady», - dedi vıtse-mınıstr.
