Energetıka mınıstrligi 4-shi munaı zaýyty qurylysyna qatysty 6-7 usynysty talqylaýda - U.Qarabalın

ASTANA. QazAqparat - Energetıka mınıstrligi 4-shi munaı zaýyty qurylysyna qatysty 6-7 usynysty talqylaýda. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Energetıka birinshi vıtse-mınıstri Uzaqbaı Qarabalın málim etti.

«Búginde bizdiń mıınstrlikte bul máselege qatysty árbir aımaqtan, kompanııalar men basqa uıymdardan 6-7 usynys bar. Olardyń barlyǵy bizdiń mınıstrlik ishindegi jumys tobynyń talqylaýynda. Árbireýiniń tıimdi, tıimsiz tusy saraptalynady. Sodan keıin Úkimet qaraýyna shyǵarylady», dedi U.Qarabalın.

Sonymen qatar ol tórtinshi munaı zaýytyn salýy kezinde qandaı jaıttarǵa basymdyq beriletindigin de egjeı-tegjeıli túsindirip ótti.

«Birinshiden, munaı óńdeý zaýyty neǵurlym tutynýshylar tyǵyz qonystanǵan jerde bolǵany durys. Sebebi, benzın ne bolmasa basqa janarmaıdy tasymaldaýdyń ózi kólik shyǵyndary esebinen kóterilip ketedi. Ekinshiden, ol jerde munaı qubyrlarynyń bolǵany durys. Óıtkeni, munaı qubyr arqyly jetkizilmese, temir jolmen tasymaldaý qymbatqa túsedi», dedi birinshi vıtse-mınıstr.

Sonymen qatar onyń aıtýynsha, munaı zaýytynan shyǵatyn ónim ishki naryqty tolyq qamtamasyz etetin bolady. Al qalǵan ónimdi eksportqa shyǵarýǵa da zaýyt salynatyn jer yńǵaıly bolýy tıis.