Energetıka mınıstrligi jylytý maýsymynyń qorytyndysyn shyǵardy
ASTANA. KAZINFORM – 2025-2026 jyldardaǵy jylytý maýsymynda iri tehnologııalyq buzýshylyqtar oryn alǵan joq. Bul týraly Úkimet otyrysynda Energetıka vıtse-mınıstri Suńǵat Esimhanov aıtty.
- 2025-2026 jyldardaǵy jylytý maýsymy aıaqtaldy. Júıeli uıymdastyrylǵan jumystyń arqasynda ol turaqty ótti. Jylytý kezeńinde iri tehnologııalyq buzýshylyqtar oryn alǵan joq. Tutynýshylar elektr jáne jylý energııasymen tolyq qamtamasyz etildi. 2025 jyly elektr stantsııalarynda jóndeý jumystaryn qarjylandyrý aldyńǵy kezeń deńgeıinen 348 mlrd teńgege deıin 6 paıyzǵa ulǵaıtyldy. Jylý jelilerinde jóndeý jumystaryn qarjylandyrý 16 paıyzǵa ulǵaıtylyp 129 mlrd teńgege deıin jetkizildi, - dedi vıtse-mınıstr.
Onyń aıtýynsha, elektr stantsııalarynda jóndeý kestesine sáıkes 10 energoblokta, 63 qazandyqta, 39 týrbınada kúrdeli jóndeý jumystary júrgizildi. Elektr jelilerinde 17 myń shaqyrym elektr berý jelisi, 420 qosalqy stantsııa jóndeldi. 323 shaqyrym jylý jelisi jańǵyrtylyp, aýystyryldy. Bul elektr stantsııalarynyń negizgi jabdyqtarynyń tozýyn - 53, elektr jelileriniń tozýyn - 66,2 jáne jylý jelileriniń tozýyn 50 paıyzǵa tómendetýge múmkindik berdi.
- Atalǵan sharalar jylytý maýsymynyń turaqty ótýine jáne eldiń energetıkalyq kásiporyndarynyń senimdi jumysyn qamtamasyz etýge tikeleı áser etti. 2025 jylǵy jeltoqsanda elektr generatsııasynyń maksımýmyna qol jetkizildi jáne ol 17 273 MVt qurady, bul ótken kezeńdegi deńgeıinen 7 paıyzǵa artyq. Jylý jelileriniń temperatýralyq kestesin saqtamaý jaǵdaılarynyń sany 3 ese qysqardy. Elektr jelilerindegi tehnologııalyq buzýshylyqtar - 12, al elektr stantsııalary boıynsha 15 paıyzǵa azaıdy, - dedi ol.
Vıtse-mınıstrdiń atap ótýinshe, kórsetilgen tehnologııalyq buzýshylyqtar boıynsha Energetıkalyq qadaǵalaý komıteti quzyreti aıasynda tıisti tekserý sharalaryn júrgizdi jáne osyndaı jaǵdaılar qaıtalanbas úshin usynymdar berildi.
- Jylytý maýsymynyń qorytyndysy boıynsha jylý elektr ortalyqtarynyń reıtıngi jaqsardy. Osylaısha, 5 Jylý elektr ortalyǵy «qyzyl» aımaqtan «saryǵa» jáne 3 Jylý elektr ortalyǵy «sarydan» «jasylǵa» kóshti. Osy baǵyttaǵy jumys jalǵasatyn bolady, - dedi Suńǵat Esimhanov.
Aıta keteıik, otyrysta ótken jylytý maýsymy qorytyndylanyp, aldaǵy maýsymǵa daıyndyq barysy pysyqtalyp jatyr.
