Energetıka mınıstrligi janarmaıdyń naqtylanǵan baǵasyn bekitti

ASTANA. KAZINFORM – 17 mamyrdan bastap sheteldik avtokólikterge arnalǵan benzın men dızel otyny bekitilgen baǵamen saýdalanady.

Іshki naryqtaǵy janarmaı teńgerimin saqtaý, sondaı-aq munaı ónimderiniń aǵyny men «sur» eksportynyń táýekelderin barynsha azaıtý maqsatynda QR Energetıka mınıstriniń sheteldik kólikterge arnalǵan AI-92, AI-93 benzıni jáne dızel otyndarynyń jańartylǵan baǵalary boıynsha buıryǵy jarııalandy. 

«AI-92 jáne AI-93 benzıni — lıtrine 245 teńge;

Qazaqstan Respýblıkasynda berilgen júrgizýshi kýáligin kórsetken kezde táýligine 100 lıtrge deıingi mólsherde — lıtrine 205 teńge;

Qazaqstan Respýblıkasynda berilgen mototsıklderge, jeńil avtomobılderge, júk kólikterine, arnaıy, mamandandyrylǵan jeńil avtomobılderge jáne avtobýstarǵa júrgizýshi kýáligin jáne kólik quralyn tirkeý kýáligin kórsetken kezde — táýligine 300 lıtrge deıingi kólemde — lıtrine 205 teńge;

Dızeldik otyn (jazǵy, maýsymaralyq) — lıtrine 315 teńge;

Qazaqstan Respýblıkasynda tirkelgen júrgizýshi kýáligin kórsetken kezde táýligine 100 lıtrge deıingi mólsherde — lıtrine 295 teńge;

Qazaqstan Respýblıkasynda beriletin júrgizýshi kýáligin jáne kólik quralyn tirkeý kýáligin kórsetken kezde júk kólikterine, arnaıy, mamandandyrylǵan jeńil avtomobılderge jáne avtobýstarǵa táýligine 300 lıtrge deıingi kólemde — lıtrine 295 teńge», — delingen qujatta.

Osylaısha, Qazaqstan Respýblıkasynyń kýáligi men kólik quralyn tirkeý týraly kýáligi bar azamattar úshin janar-jaǵarmaı baǵasy ózgerissiz qalady.

Aıta keteıik, qazirgi ýaqytta janar-jaǵarmaı qoryn óndirý, jóneltý jáne tolyqtyrý úzdiksiz júrgizilýde, bul rette munaı ónimderiniń qomaqty qorynyń bolýyna baılanysty ishki naryqtaǵy jaǵdaı turaqty.