Energetıka mınıstrligi janar-jaǵarmaı materıaldary naryǵyndaǵy jaǵdaıǵa pikir bildirdi
ASTANA. KAZINFORM - Qazirgi ýaqytta elimizde janar-jaǵarmaı materıaldarynyń tapshylyǵynyń týyndaý qaýpi joq, dep habarlaıdy QR Energetıka mınnıstrliginiń baspasóz qyzmeti.
Baspasóz qyzmetiniń habarlaýynsha, ishki naryqta jazǵy jáne týrıstik maýsym kezeńinde tutynýshylardy turaqty ári úzdiksiz qamtamasyz etýge jetkilikti kólemde munaı ónimderiniń qory qalyptastyrylǵan.
Jalpy rezerv kólemi 1,1 mln tonnadan asady. Onyń ishinde AI-92 jáne AI-95 markaly avtomobıl benzıni, sondaı-aq dızel otynynyń jetkilikti qory bar. Atalǵan qorlar turaqty negizde saqtalyp, munaı óńdeý zaýyttarynyń aǵymdaǵy óndirisi esebinen únemi tolyqtyrylyp otyrady.
Buǵan deıin engizilgen memlekettik retteý sharalary óz kúshinde qalyp otyr. Atap aıtqanda, bıylǵy 21 qarashaǵa deıin munaı ónimderiniń jekelegen túrlerin avtomobıl jáne temirjol kóligimen eksporttaýǵa ýaqytsha shekteý engizilgen.
Sonymen qatar, avtokólik quraldarynyń memlekettik shekarany táýligine bir retten artyq kesip ótýine shekteý qoıylǵan. 20 maýsymnan bastap ótkizý pýnktterinde baqylaý kúsheıtildi. Bul jumystarǵa Ulttyq qaýipsizdik komıteti, Іshki ister mınıstrligi, Memlekettik kirister komıteti jáne Qarjylyq monıtorıng agenttiginiń bólimsheleri tartylǵan.
-El ishinde de jaǵdaı Úkimet pen ýákiletti memlekettik organdardyń turaqty baqylaýynda. Ákimdikter janynan jetekshilik etetin ákim orynbasarlarynyń basshylyǵymen jáne kásipkerlik basqarmalarynyń qatysýymen óńirlik shtabtar jumys isteıdi. Jergilikti jerlerdegi negizgi jumysty Memlekettik kirister departamentteri, Qarjylyq monıtorıng agenttiginiń Ekonomıkalyq tergep-tekserý departamentteri jáne Básekelestikti qorǵaý jáne damytý departamentteri júrgizip jatyr. Qazirgi ýaqytta olar kúsheıtilgen maqsatty tekserýler júrgizip, janarmaı quıý stantsııalaryndaǵy otyn qoryna monıtorıng jasap, janar-jaǵarmaıdyń zańsyz áketilýiniń jolyn kesý jáne ónimdi ótkizýshiler tarapynan bolýy múmkin negizsiz áreketterge jedel den qoıý jumystaryn júzege asyryp jatyr. Sonymen qatar, Qazaqstanda avtomobıl otynynyń bólshek saýdadaǵy baǵalary memleket tarapynan rettelmeıtinin jáne tek naryqtyq qaǵıdattar negizinde qalyptasatynyn atap ótken jón,-delingen habarlamada.
Osyǵan deıin ІІM 12 tonna janarmaıdy zańsyz áketpek bolǵandardyń jolyn keskeni týraly jazdyq.
