Energetıka mınıstrligi benzın baǵasyna engizilgen ýaqytsha moratorııdiń iske asý tártibin túsindirdi
ASTANA.KAZINFORM — Bul shara ishki naryqty turaqtandyrý jáne tutynýshylardyń múddesin qorǵaý maqsatynda Úkimettiń tapsyrmasyna sáıkes qabyldandy. Engizilgen ýaqytsha moratorııdiń negizgi prıntsıpi – AI-92 benzıni men dızel otynynyń bólshek saýda baǵasyn avtojanarmaı quıý stansalarynda 2025 jylǵy 16 qazandaǵy deńgeıde saqtaý. Bul týraly vedomstvonyń baspasóz qyzmeti málim etti.
Mınıstrliktiń dereginshe, el aýmaǵynda biryńǵaı shekti baǵa belgileý qarastyrylmaǵan. Mundaı ıkemdi tásil naryqtaǵy básekelestikti saqtap qalýǵa múmkindik berip, operatorlar arasyndaǵy baǵa aıyrmashylyǵyn túsindiredi.
Qazirgi tańda iri janarmaı quıý beketterinde AI-92 markaly benzın baǵasy lıtrine 213–239 teńge, dızel otyny — 317–337 teńge aralyǵynda. Bul sharany iske asyrý naryq qatysýshylarymen naqty úılestirilgen jumys arqyly júzege aspaq.
— Jaǵdaıdy turaqtandyrý maqsatynda Energetıka mınıstrligi Básekelestikti qorǵaý jáne damytý agenttigimen birlesip, aldyn alý sharalaryn qolǵa aldy. Keshe iri kóterme jetkizýshiler men janarmaı quıý stantsııalary jelileri basshylarynyń qatysýymen keńes ótti. Keńeste Úkimettiń JJM baǵasyn odan ári kóterýge jol bermeý jónindegi naqty ustanymy jetkizildi, — delingen habarlamada.
BQDA tarapynan kúndelikti monıtorıng júrgizilip, qajet bolǵan jaǵdaıda monopolııaǵa qarsy sharalar qabyldanatyn bolady. Elimizde janarmaı qory 3–4 aptaǵa jetkilikti deńgeıde jáne turaqty tolyqtyrylyp otyrady. Qazirgi tańda AI-92 benzıniniń kólemi 341 myń tonnany, dızel otyny — 405 myń tonnany quraıdy. Bul kórsetkishter baǵanyń turaqtylyǵyn saqtaýǵa múmkindik beredi. Eki otandyq munaı óńdeý zaýyty shtattyq rejımde jumys istep tur.
Al Atyraý munaı óńdeý zaýyty josparly jóndeýden keıin 25 qazannan bastap kezeń-kezeńimen iske qosylady, bul naryqtaǵy teńgerimdi nyǵaıtýǵa septigin tıgizedi. Energetıka mınıstrligi moratorııdiń saqtalýyn baqylap, aımaqtyq shtabtar men naryq qatysýshylarymen úılestirý jumystaryn júrgizedi. Naryqtaǵy jaǵdaı Úkimettiń jiti baqylaýynda.
Eske sala keteıik, keshe Premer-mınıstr Úkimet músheleriniń, basqa da memlekettik organdar men uıymdar basshylarynyń qatysýymen Memleket basshysynyń azamattar múddesi úshin ekonomıkalyq reformalar baǵdarlamasyn júzege asyrýdy retke keltirý jónindegi tapsyrmalaryn oryndaý máseleleri boıynsha ótkizgen keńeste bıylǵy 16 qazannan bastap ınflıatsııa deńgeıi turaqtanǵanǵa deıin AI-92 markaly benzın men dızel otyny baǵasyn odan ári kóterýge moratorıı engiziletinin málimdedi.