Energetıka mınıstrligi Teńizdegi jaǵdaıdy táýlik boıy baqylaýda ustap otyr
ASTANA. KAZINFORM — Teńiz ken ornynda qazirgi sátte barlyq kúsh pen tehnıkalyq resýrstar tolyq jumyldyryldy. Energetıkalyq nysandar men elektr energııasyn bólý júıelerin tekserý boıynsha qarqyndy jumys istelip jatyr. Bul týraly Energetıka mınıstrliginiń baspasóz qyzmeti habarlady.
Energetıka mınıstrligi Atyraý oblysyndaǵy ken oryndarynda óndiristik operatsııalardy qalpyna keltirý boıynsha aıtarlyqtaı ilgerileýshilik týraly habarlaıdy.
Mańyzdy kezeń retinde 26 qańtarda Ekinshi býyn zaýytynyń sátti iske qosylýyn atap ótýge bolady. Qazirgi ýaqytta zaýyt jumysy búgin tańǵy saǵat 04:00-de iske qosylǵan Korolev ken ornynyń shıkizaty esebinen qamtamasyz etilip jatyr. Qazirgi ýaqytta shıkizat aǵyny táýligine 2 500 tonna. Mamandar júıeni toltyrý jáne jobalyq qýatqa shyǵý úshin mýltıfazalyq aǵyndy berý kólemin josparly túrde arttyryp otyr.
Teńiz ken ornynda qazirgi sátte barlyq kúsh pen tehnıkalyq resýrstar tolyq jumyldyryldy. Energetıkalyq nysandar men elektr energııasyn bólý júıelerin tekserý boıynsha qarqyndy jumys istelip jatyr. Resmı aqparatqa sáıkes, nysanda qorytyndy tehnıkalyq synaqtar ótkizý úshin barlyq qajetti personal jumyldyrylǵan.
Qazirgi tańda energııamen jabdyqtaý júıesiniń qaýipsiz iske qosylýy rastaldy, Teńiz ken orny jaqyn arada iske qosylatyn bolady «Teńizshevroıl» kompanııasyna ónerkásiptik qaýipsizdik pen eńbekti qorǵaý (HSE) talaptaryn qatań saqtaı otyryp, óndiristi barynsha jedel qalpyna keltirý mindeti júkteldi.
Ekinshi býyn zaýytynyń sátti iske qosylýyna arnaıy tehnologııalyq ótpeli jeli montajynyń jedel aıaqtalýy septigin tıgizdi. Kesteniń kelesi mańyzdy kezeńi — 2 aqpan.
Bul kúnge qaraı kompressor men tórt transformatordy paıdalana otyryp, Qysymdy arttyrý júıeleri arqyly jumysty qaıta jandandyrý josparlanyp otyr. Bul Tehnologııalyq jeliler kesheni men Ekinshi býyn zaýytyna shıkizatty tolyqqandy ári turaqty berýdi qamtamasyz etýge múmkindik beredi.
Energetıka mınıstrligi men «QazMunaıGaz» UK AQ TShO-ǵa tehnıkalyq sharalardy úılestirýde jan-jaqty qoldaý kórsetip, jaǵdaıǵa saǵat saıynǵy monıtorıng júrgizip otyr.
Barlyq qalpyna keltirý jumysyn tikeleı Teńiz ken ornynda jedel baqylaý jáne úılestirý maqsatynda vedomstvo men ulttyq kompanııa basshylyǵy sol jerde turaqty túrde jumys istep jatyr.
Atap aıtqanda, Energetıka vıtse-mınıstri Qaıyrhan Tutqyshbaev pen «QazMunaıGaz» UK AQ iri munaı-gaz jobalary departamentiniń dırektory Jandos Jylqaıdarov baqylaýdy tikeleı nysan basynda júzege asyryp jatyr.
Óndiristik tsıkldi qalpyna keltirý máselesi Energetıka mınıstrligi basshylyǵynyń erekshe ári turaqty baqylaýynda. TShO kompanııasy senimdi óndiristik qyzmetti qamtamasyz etýge beıildiligin saqtaı otyryp, barlyq ınfraqurylymnyń daıyndyǵy men protsesterdiń qaýipsizdigi rastalǵan saıyn óndiris kólemin kezeń-kezeńimen arttyratyn bolady.
Aıta ketelik Teńiz ken ornynda munaı óndirý qaıta jandanǵany týraly jazǵan edik.